Autor: Linda Krasniqi

Pri Fest, festivali më i madh i filmit që mbahet në Prishtinë, ka bërë sot përmbylljen e edicionit të 13-të të tij, i cili u zhvillua për gjashtë ditë radhazi në kryeqytetin kosovar.

Festivali Ndërkombëtar i Filmit në Prishtinë, i njohur gjithashtu si PriFilmFest, është një festival filmi që mbahet çdo vit në Prishtinë, Kosovë, i cili shfaq prodhime të shquara ndërkombëtare të kinemasë në rajonin e Ballkanit dhe më gjerë.

Pas shumë aktivitetve që u zhvilluan gjatë këtyre ditëve të festivalit, sot me datën 29 gusht, e diel, u mbajt ceremonia e ndarjes së çmimeve të PriFest 2021, e cila filloi nga ora 18:00h në tapetin e kuq, në hapësirën para Teatrit Kombëtar, shkruan Gazeta Online “Reporteri.net”.

Dita e sotme e këtij festivali filloi me një panel diskutimi rreth filmave “Looking for Venera “ dhe “After Winter“, me aktorë, regjisorë dhe producentë të këtyre dy filmave. Ku të ftuar ishin Norika Sefa, Besnik Krapi, Kosovare Krasniqi, Bleon Munovi, Maja Susa dhe Ivona Kustudic. Të dy filmat u shfaqen mbrëmjen e djeshme në festival, dhe se dy ekipet thanë që është pritur shumë mirë nga publiku dhe miqtë.

Pas disa aktiviteteve të sotme të Pri Festit, i erdhi radha edhe për ndarjen e çmimeve.

Çmimi ‘Prifest best project in Pitch Competition for PriForum 2021’ shkoi për regjisoren Ajola Dala dhe producenten Sabina Kodra për filmin “Made of Dust”.

“Faleminderit shumë. Kjo është hera e parë që jam këtu dhe PriFilmFest është duke u bërë një familje për mua dhe jo vetëm një festival. Vjosa, Fatos, ju jeni më të mirët. Ajola Dala nuk është këtu por jam e sigurt që ajo është shumë shumë e lumtur për këtë çmim. Ne do të bëjmë më të mirën për të sjell këtë projekt sa më larg që të mundemi”, tha Kodra.

Fituesi i çmimit të shërbimeve ‘Video Post-produksion’ shkoi për filmin “2000: A Post-War Odyssey” të regjisorit Zgjim Terziqi. “Faleminderit të gjithëve që keni ardhur dhe faleminderit jurisë. Ky ka qenë çmimi që ne e kemi dashur dhe e morrëm, andaj jemi shumë të lumtur”, tha Terziqi në ceremoni, shkruan Gazeta Online Reporteri.net.

Fituesi i çmimit të shërbimeve ‘Sound Post-produksion’ shkoi për filmin “The sun, the moon and the eleven stars’’ të regjisores Ema Kulara dhe producentes Ema Ogzan-Tenoglu.

Çmimi për filmin e shkurtër më të mirë ndërkombëtar shkoi për “Shakira”, Francë.

Filmi më i mirë i programit të filmave të metrazhit të mesëm shpallet filmi “Jesus Egon Christ”, Gjermani.

Filmi fitues i programit të filmave dokumentarë shpallet filmi “The end of kings”, Francë.

Fituesi i zgjedhur nga juria e mediave për këtë edicion të PriFest-it është filmi “Mehrunisa”, Austri. “Faleminderit shumë jurisë dhe festivalit. Ne kemi pasur një rrugëtim të gjatë dhe mendoj se kjo është pjesa më interesante e rrugëtimit tonë me këtë çmim. Është hera e parë në Kosovë dhe do të mbaj me vete shumë kujtime dhe ky festival me të vërtetë është një vend ku vjen si vizitor por shndërrohesh në një mik shumë të mirë”, tha regjisori i filmit, shkruan Gazeta Online “Reporteri.net”.

Çmimi për filmin më të mirë global shkoi për “Rival”, Gjermani.

Fituesi i zgjedhur nga juria FIPRESCI për filmin më të mirë ballkanik është filmi “Full Moon”, Bosnje dhe Hercegovinë.

Çmimi i përvitshëm për arritje për një artist nga Kosova në fushën e kinematografisë shkoi për regjisoren Blerta Basholli. “Është kënaqësi me qenë në Prishtinë dhe PriFest. Ne gjithmonë kemi dëshirë që filmat tonë dhe projektet tona të shkojnë çdo ku në botë por në fund të fundit kënaqësia dhe qejfi më i madh është kur jemi këtu në Kosovë afër kolegëve dhe njerëzve tonë. Çmimi vjetor për arritje kinematografike është një çmim shumë i veçantë dhe falënderoj shumë PriFestin sepse fillimisht ishte e veçantë të shihja premierën e parë fizike dhe atë pikërisht në Kosovë”, tha Basholli.

Çmimi “Aktori më i mirë” (Ballkan) shkon për aktorin e “Full Moon”, Alban Ukaj, Bosnje dhe Hercegovinë.

Çmimi “Aktorja më e mirë” (Ballkan) shkon për aktoret e “Luaneshat e Kodrës”, Flaka Latifi, Era Balaj dhe Uratë Shabani, Kosovë/Francë. “Jam shumë e emocionuar sepse me të vërtetë nuk e kam pritur këtë çmim. Është hera e dytë në një festival por është hera e parë në festivalin e vendit tim dhe me të vërtetë kam shumë emocione më të mëdha dhe më të mira ndoshta për shkak që është vendi im, jeni njerëzit e mi. Jam shumë e lumtur dhe ju falënderoj të gjithëve për krejt këtë energji kaq të mirë që ma keni dhuruar edhe gjatë prezantimit të filmit”, tha Latifi.

Çmimi për regjisoren më të mirë të filmave ballkanik shkon për Luana Bajramin për regjinë e filmit “Luaneshat e Kodrës”, Kosovë/Francë. “Faleminderit shumë. Ky çmim ka shumë domethënie për mua. Ky çmim mendoj që e vlerëson normal filmin, punën tonë si ekip por edhe e vlerëson rininë, gjeneratën e re dhe ta mbajnë që arti dhe artistët nuk duhet të paragjykohen por vetëm të diskutohen dhe të mbështeten. Faleminderit shumë”, tha Bajrami.

Filmi më i mirë i Ballkanit shpallet filmi “Zgjoi” me regji të Blerta Basholli, Kosovë/Maqedoni e Veriut/Shqipëri/Zvicër.

“Është kënaqësi shumë e madhe për të fituar çmimin më të mirë në Prishtinë. E kam kuptuar që ska asgjë të keqe prej lotëve sepse jemi gra më emocionale por që një moment i tillë është me të vërtetë emocional për shumë arsye. Këtë Hyjneshë në fron që është shumë e bukur dhe simbol i Prishtinës, është shumë kënaqësi që ta marrësh sot këtu para jush dhe unë ia dedikoj Fahrije Hotit dhe të gjithave grave të Kosovës të cilat na inspirojnë çdo ditë“ , tha Basholli.

Krejt në fund, të gjithë fituesit u ftuan në skenë që të shkrepin një fotografi të cilën do ta kenë pranë vetes e zemrës së tyre për një kohë të gjatë. /Reporteri.net/.