Gazeta Online “Reporteri.net” është media e parë që ka raportuar dje se si në laboratorin privat “Medical&Laboratory Services” i cili është në pronësinë e vajzës së Blerim Devollit, Vlera Devollit, testi për coronavirus RT PCR kushton hiç më pak se 200 euro.

Fatura e lëshuar nga ky laborator e publikuar në rrjetet sociale vërteton se çmimi për testin molekular për COVID-19 kap shifrën e 200 eurove.

Zyrtarë të Autoritetit të Konkurrencës kanë thënë për Gazetën Online “Reporteri.net” se nëse laboratori në fjalë vendosur çmim në vlerë prej 200 euro për test PCR dhe e ka deklaruar një çmim tjetër në AKK, ky laborator potencialisht ka bërë këto shkelje ligjore dhe mund të mbyllet.

Valon Prestreshi, kryetar i Autoritetit të Konkurencës ka thënë për Reporteri.net se nëse laboratori në fjalë ka vendosur çmim në vlerë prej 200 euro për test PCR dhe e ka deklaruar një çmim tjetër në AKK, ky laborator potencialisht ka bërë vepër penale-mashtrim dhe disa shkelje të tjera ligjore.

“Kam pranuar dhjetra ankesa nga ju, se njëra nga laboratorët e licensuar ka kryer shërbimin e PCR për Sarc Cov 2 në vlerë prej 200 euro. Siç jeni të gjithë të njoftuar, AKK është duke e monitoruar këtë proces me kujdes, dhe posedon listën e çmimeve të secilit laborator të licensuar. Siç jeni të gjithë të njoftuar, AKK këtë shërbim e ka cilësuar si aktivitet ekonomik të interesit publik e rrjedhimisht interesit shtetëror. Tani, nëse laboratori në te cilin ju jeni ankuar ka vendosur çmim në vlerë prej 200 euro për test PCR dhe e ka deklaruar një çmim tjetër në AKK, ky laborator potencialisht ka bërë këto shkelje: Mashtrim – vepër penale, Autoriteti mund të ushtroj kallxim penal ne prokurorinë speciale nësëe është konsumuar vepra penale Mashtrim, kKa vendosur AKK në lajthitje dhe ka ofruar informacione të pa sakta – personi përgjegjës denohet 1000-3000 euro, dhe ndërmarrja denohet deri ne 2% të qarkullimit vjetor, ka kryer shpërdorim të pozitës dominuese, mund të denohet deri në 10% të qarkullit vjetord dhe Autoriteti në javen ne vijim, mund ta përdor instrumentin ligjore, masat e përkohshme- mbyllje të veprimatarisë deri ne 6 muaj”, ka thënë Prestreshi për Reporteri.net.

Pas raportimeve, ka reaguar kryeministri Avdullah Hoti, i cili ka thënë se situata e pandemisë nuk guxon të përdoret për përfitime jashtë normave të ekonomisë së tregut. /Reporteri.net/.