Kryeministri Avdullah Hoti ka reaguar sërish për situatën me COVID 19, duke potencuar se rreziku po rritet duke parë trendin.

Kryeministri ka alarmuar se mund të preken më shumë jetë njerëzisht dhe do të thellohet kriza ekonomike e që sipas tij, do të stërngarkohet edhe sistemi shëndetësor, shkruan Reporteri.net.

Për këtë, ai ka bërë thirrje të respektohen masat mbrojtëse si maskat dhe dezinfektimi, si dhe mbajtja e distancës.

“Vendi ynë mund të përfshihet nga vala e dytë e infektimeve me virusin #COVID19! Në bazë të trendit të ditëve të fundit me raste të reja të infektimeve, ky rrezik është shumë real. Mund të preken edhe më shumë jetë njerëzish, do të thellohet kriza ekonomike, ndërsa do të stërngarkohet sistemi i shëndetësisë!”, thotë ai.

Ndryshe, Qeveria e Kosovës së bashku me MSH dhe IKSHPK ka hartuar  “Manual për mbrojtje nga përhapja e COVID-19” dhe ka angazhuar 200 profesionistë për të mbikëqyrur./Reporteri.net.

Postimi i plotë i Hotit:

Vendi ynë mund të përfshihet nga vala e dytë e infektimeve me virusin #COVID19! Në bazë të trendit të ditëve të fundit me raste të reja të infektimeve, ky rrezik është shumë real. Mund të preken edhe më shumë jetë njerëzish, do të thellohet kriza ekonomike, ndërsa do të stërngarkohet sistemi i shëndetësisë!

Prandaj ju lus që t’i keni parasysh masat obligative për mbrojtje:

● Vendosni maska gjatë gjithë kohës në hapësira publike

● Shmangni prekjen e syve, hundës dhe gojës me duar të papastërta

● Pastroni dhe dezinfektoni shpesh objektet dhe sipërfaqet e prekura siç janë tavolinat, tastierat, telefonat, parmakët dhe rezat e dyerve

● Mbajeni distancën fizike

● Nuk lejohet më shumë se 1 person në 8 metra katrorë në lokale

● Pronarët e lokaleve janë të obliguar të publikojnë numrin maksimal të lejuar të personave para hyrjes së lokaleve

Lehtësimi i masave për lëvizje të lirë ka qenë i domosdoshëm, por shfrytëzoj rastin që t’ju bëj thirrje sërish që t’i zbatoni me përpikmëri masat mbrojtëse. Ne kemi hartuar një “Manual për mbrojtje nga përhapja e COVID-19”, ndërsa Ministria e Shëndetësisë në bashkëpunim me Institutin Kombëtar të Shëndetësisë Publike të Kosovës, do të angazhojë rreth 200 profesionistë shëndetësorë që do të monitorojnë zbatimin e këtyre masave!

KUJDES, rreziku është real! #mbajedistancen