Drejtori i Qendrës Kryesore të Mjekësisë Familjare në Deçan, Selmon Berisha ka folur për rastin e djeshëm në këtë komunë, ku qindra qytetarë dyshohet se u helmuan nga uji i pijshëm.

Ai ka thënë se që nga e shtuna në këtë qendër janë pranuar 823 pacientë prej të cilëve 428 me simptoma të njëjta, e të cilët dyshohet të jenë helmuar nga uji.

Berisha ka thënë se iu kanë ftuar institutin e shëndetit publik për të marrë mostra për të ditë shkaqet e këtij helmimi.

Sipas tij edhe Prokuroria ka filluar me hetime.

Lidhur me këtë çështje pas pak pritet që kryetari i Deçanit të mbajë konferencë për media.

Deri sa rezultatet e analizave të fundit të këtij uji nuk kanë dalë ende, që nga e diela në mbrëmje, ujësjellësi rajonal “Hidrodrini” ka bërë ndërprerjen e furnizimit me ujë në zonat e dyshuara për helmim masiv.

Ujësjellësi “Hidrodrini” ka bërë apel për kujdes, por duke thënë se “deri në arritjen e rezultateve, nuk mund të konstatohet asgjë në zbardhjen e dyshimeve për ujë të helmuar ose jo”.