Drejtori i Shëndetësisë në Prishtinë, Bujar Gashi, ka dhënë detaje se si qëndron kjo komunë sa i përket situatës së krijuar nga pandemia e coronavirusit.

Gashi ka konfirmuar për Klan Kosovën se në Prishtinë gjenden 540 raste aktive me Covid-19.

”Javën e fundit kishim një numër pak më të theksuar të rasteve në komunën tonë të cilat me rastet e sotit që ishin 36 aktive shpiejnë numrin në 540 raste aktive në kryeqytet”.

”Normalisht kjo është shifër e madhe dhe probabiliteti për të pasur raste të reja është shumë më i madh sesa në të kaluarën”.

”Kjo është një rritje bukur e madhe e cila normalisht duhet të jetë një sinjal që të gjithë të zbatojnë rekomandimet që vijnë nga IKSHPK dhe Ministria e Shëndetësisë”.

Cilat lagje janë më të prekura nga Covid-19?

”Është vështirë të specifikohet se cila lagje prin me Covid-19 sepse kemi afërsisht 30 lagje – thuajse të gjitha lagjet e komunës së Prishtinës – po ashtu dhe disa fshatra që kanë numrin e përafërt, lagjet më të mëdha prinë më numër të tyre siç janë Kodra e Trimave, Arbëria ose Ulpiana”.

Ka nga të infektuarit të prekur mjekë, apo personel shëndetësor?

”Deri të premten e kaluar, në kujdesin parësor shëndetësor nuk e kishim asnjë punëtorë të infektuar me Covid-19, por nga e premtja deri më sot kemi 12 punëtorë shëndetësorë të infektuar me Covid-19”.

”Tani jemi me 80 punëtorë shëndetësorë në vetizolim”.