Drejtori i Policisë së Kosovës, Samedin Mehmeti ka thënë se Policia e Kosovës nuk bie pre e presioneve nga politika apo grupet e ndryshme të interesit.

Mehmeti, në emisionin Udhëve të RTK-së ka deklaruar se përkushtimi i Policisë së Kosovës është që të trajtojë rastet pa rënë pre e presioneve nga jashtë.

“Unë nuk e di çka thuhet dhe nuk mund t’i komentoj këto deklarata, por unë e di se cili është përkushtimi ynë. Përkushtimi ynë është që të mos kemi asnjë presion politik dhe të mos biem pre e ndikimeve nga jashtë. Gjithashtu përkushtimi ynë është që rastet t’i trajtojmë pa pasur asnjë ndikim nga jashtë”, ka deklaruar Mehmeti.

Ai ka thënë zyrtarët policorë duhet ta ruajnë integritetin e tyre pa asnjë ndikim nga jashtë. Përndryshe, Mehmeti ka thënë se zyrtarët të cilët bien pre e presioneve nga jashtë do të përballen me ligjin.