Aleanca për Ardhmërinë e Kosovës ka konfirmuar se sot do të vendosin për hyrjen në një koalicion parazgjedhor me Nismën.

Në njoftimin e AAK-së drejtuar mediave bëhet e ditur se kjo do të ndodhë pas mbledhjes së Këshillit të Përgjithshëm të partisë, e që më pas gjithçka do të zyrtarizohet në një konferencë për media, në ora 18:00.

“Këshilli i Përgjithshëm i Aleancës për Ardhmërinë e Kosovës sot vendos për koalicionin parazgjedhor AAK-Nisma.

Pas mbledhjes së Këshillit të Përgjithshëm, në ora 18:00 mbahet konferencë për media ne selinë e AAK-së në Prishtinë”, thuhet në njoftimin e AAK-së.

Gazeta online Reporteri.net, raportoi sot për bashkimin në një koalicion parazgjedhor të AAK-së dhe Nismës, për zgjedhjet e ardhshme nacionale.

Siç mëson gazeta online Reporteri.net, marrëveshja për koalicionin parazgjedhor është si në vijim:

Ramush Haradinaj pritet të jetë bartës i listës dhe njëherit kandidat për kryeministër. Pas tij në listë do të jetë kreu i Nismës, Fatmir Limaj.

AAK pritet të ketë të rezervuar një listë me 70 kandidatë për deputetë, Nismës i janë lënë 30 vende dhe 10 vende tjera do të lihen për aderime të mundshme.

Renditja në listë zgjedhore do të jetë, dy kandidatë të AAK-së dhe një i Nismës.

AAK dhe Nisma kishin qenë në koalicion bashkë dhe në bashkëqeverisje edhe para disa viteve.

Bëhet fjalë për vitin 2017 deri në vitin 2019, kur Haradianj ishte kryeministër e Limaj zëvendës i tij.

Ndërkaq në zgjedhjet që pasuan, po në vitin 2019, Nisma që në atë kohë ishte në koalicion me AKR-në nuk arriti ta kalojë pragun duke mbetur kështu jashtë Kuvendit.

Pak javë e ndajnë kryeministrin e Kosovës, Albin Kurti, që të hyjë në vitin e katërt të mandatit qeverisës, ndërkohë që partitë opozitare vazhdimisht kanë qenë të zëshme duke kërkuar largim të kryeministrit Kurti, por jo edhe për mënyrën se si duhet të arrihet ky qëllim.

AAK-ja ka kërkuar rrëzimin e Qeverisë përmes mocionit të mosbesimit, kërkesë kjo që nuk ka gjetur përkrahje nga partitë e tjera opozitare.

14 shkurti, 2021 nxori Vetëvendosjen fituese të zgjedhjeve me rezultat të thellë përballë partive të tjera me mbi 50% të votave. Ky rezultat i mundësoi Lëvizjes Vetëvendosje që ta krijonte e vetme kabinetin e ardhshëm qeveritar. /Reporteri.net/

70 kandidatë për deputetë AAK, e 30 Nisma – detaje nga marrëveshja e re mes Ramush Haradinajt e Fatmir Limajt