Zëvendëskryeministri i Kosovës, Haki Abazi, ka publikuar dokumentin me vendimin e Qeverisë për masat e reja për mbrojtje e parandalim të përhapjes së koronavirusit.

Abazi  ka thënë se Qeveria mori vendim për të rritur disiplinën e për të mos rrezikuar qytetarëtm shkruan Reporteri.net.

Abazi ka folur edhe për bisedën e djeshme përmes telefonit që ka pasur kryeministri Kurti me kancelaren gjermane, Angela Merkel. Abazi ka thënë se kancelarja Merkel ka përkrahur vendimet e qeverisë Kurti.

Tutje Abazi ka akuzuar presidentin Thaçi, duke thënë se ai kreu vepër penale mbrëmë duke thirrur policinë që të mos e respektojë vendimet e qeverisë.

Ky është postimi i plotë i Abazit:

Mirëmëngjesi!

Të jemi të qartë, mbrëmë Qeveria e Republikës së Kosovës mori vendime për të rritur disiplinën, për të mos rrezikuar qytetarët dhe për të zvogëluar në minimum mundësinë e infektimit dhe shpërndarjes së virusit Covid-19.

Ky është preokupimi kryesor i Qeverisë Kurti. Gjithaq, Kancelarja Gjermane ka përshendetur dhe ka përkrahur vendimet e Qeverisë dhe ka biseduar direkt me kryeministrin Kurti.

Vetëm dy persona dolën kundër në të njëjtën kohë: Thaçi dhe Mustafa.

Nuk e patën hallin te tarifa, por sesi të ndikojnë për ta ndalur e penguar punën e Qeverisë Kurti.

Presidenti Thaçi kreu vepër penale mbrëmë dhe kjo nuk është hera e parë. Ai thirri policinë që të mos e respektojë vendimet e qeverisë. Bazuar në cilin ligj apo kushtetutë ka të drejtë, çfarë në fakt do!?

Nuk është kohë për të menduar sa tendera do t’i kishin marrë e sa para të buxhetit do t’ju ishin falë e dhënë dhëndurëve, kushërinjve e dajallarëve. Është koha që të mendohemi, mundohemi e të punojmë bashkë për të mbrojtur e garantuar jetën e çdo qytetari.

Të gjithë qytetarët e kanë mirëkuptuar secilën masë që kemi marrë deri tani. Kjo gjendje nuk ka ndodhur asnjëherë në historinë e njerëzimit në këtë formë. Gjatë ditës bashkë do të sqarojmë pyetjet që keni.

Bashkë e me emër të Zotit, si dhe duke përkrahur njëri-tjetrin do ta tejkalojmë edhe këtë sfidë.