Shefi i Grupit Parlamentar të PDK-së, Abelard Tahir ka kërkuar nga kryeministri Kurti të tregojë se me çfarë parimesh po shkon për të dialoguar në Bruksel.

Tahiri ka thënë se Kurti nga prioriteti i 7 e vuri dialogun në prioritet të parë. Ai ka kërkuar nga kryeministri që të tregojnë nëse është ende kusht për rifillimin e dialogut zbardhja e fatit të të pagjeturve.

“Vizita e Kurtit në Bruksel është pritur,  pasi duket qartë se ka një angazhim testues rreth dialogut. Ishte një vizitë përgatitore për dialogun. Për shkak të këtij nxitimi që prioriteti i 7 i Kurtit u bë i pari unë dua ti shtroj disa pyetje.

Ne kërkojmë nga Kurti t’ia bëjë me dije qytetarëve se a qëndrojnë ende kushtet e tij se pa u zbardhë fati i të pagjeturve, dialogu nuk mund të rifillojë.  Me çfarë delegacioni Kurti po shkon në Bruskel, a e udhëheq ai dialogun apo presidentja Osmani”, ka thënë Tahiri.

Ai po ashtu ka kërkuar nga kryeministri Kurti që të tregojë qëndrimin e tij rreth marrëveshjes së Uashingtonit.

“Zoti Kurti para deputetëve të PE theksoi se marrëveshja e Uashingtonit është bërë për të mos u zbatuar. Është mirë me sqaru se cili është qëndrimi i Kosovës karshi kësaj marrëveshje. Ende nuk e kemi dëgju as edhe një fjalë të vetme nga ai”, tha ndër të tjera Tahiri.