Ministri i Punëve të Brendshme Agim Veliu, javën e ardhshme është ftuar nga Komisioni për Çështje të Sigurisë dhe Mbrojtjes për të raportuar lidhur me rastin e kasafortës me dokumente të klasifikuara shtetërore, rast për të cili raportoi dje Gazeta Online ‘Reporteri.net’.

Nënkryetari i këtij komisioni Bekë Berisha, tha se në mbledhjen e ardhshme do të sqarohet gjithçka lidhur me rastin.

“Ne e kemi thirrur të raportojë në komision, ministrin e Punëve të Brendshme dhe pastaj aty do të sqarohet gjithçka”.

Gazeta Online ‘Reporteri.net’ ka raportuar të hënën se si kasaforta me dokumente të klasifikuara shtetërore që mbajnë vulën e konfidencialitetit dhe të cilat lidhen direkt me sigurinë kombëtare u la e hapur në zyrën e ish-ushtruesit të detyrës së ministrit të Punëve të Brendshme, Xhelal Sveçla, aty ku duhej të ishin nën dry.

Me ligj parashihen sanksione penale jo vetëm për ata që e nxjerrin por edhe ata që nuk e mbrojnë rrjedhjen e këtyre dokumenteve në publik.

Fjala është për kasafortën në të cilën ruhen dokumentet konfidenciale të ministrit të Punëve të Brendshme që përmbajnë të dhëna të rëndësishme për sigurinë e shtetit.

A u cënua siguria kombëtare – Sveçla la të hapur kasafortën ku ruhen dokumentet konfindenciale të shtetit