Asosacioni i Gazetarëve të Kosovës, ka reaguar pas sulmit që i është bërë gazetarit të Reporterit, Shkumbin Kajtazi.

Përmes një postimi në faqen e tyre zyrtare, AGK njofton se kanë marrë me shqetësim lajmin se është tentuar të digjet vetura e gazetarit të Reporterit.

Po ashtu bëhet e ditur se AGK ka dërguar pyetje në Policinë e Kosovës që të marrë më shumë informacione rreth këtij rasti, shkruan Reporteri.net.

AGK kërkon nga organet e drejtësisë që urgjentisht të hetohen motivet e sulmit dhe kryesi i këtij akti të dalë para drjetësisë pasi që sipas tyre, kërcënimet e tilla janë të papranueshme dhe cenojnë rëndë lirinë e shprehjes.

Ky është njoftimi i tyre i plotë:

PRISHTINË 14.06.2020 – Asociacioni i Gazetarëve të Kosovës, me shqetësim ka marrë lajmin se është tentuar të digjet vetura e gazetarit, Shkumbin Kajtazi.

Kajtazi përmes një postimi në llogarinë e tij në Facebook, ka bërë të ditur se mbrëmë në rrugën “Evlia Çelebia” në Mitrovicë, një person kishte tentuar t’ia digjte me benzinë veturën e tij. Këtë akt, sipas gazetarit e kanë parandaluar banorët e kësaj rruge, të cilët e kishin njoftuar edhe Policinë e Kosovës.

Sipas Kajtazit, PK ka siguruar një videoincizim ku duket kryesi, e po ashtu Forenzika ka gjetur në vendin e ngjarjes shishen nga e cila u derdh benzina.

AGK menjëherë ka dërguar pyetje në Policinë e Kosovës që të marrë më shumë informacione rreth këtij rasti.

AGK kërkon nga organet e drejtësisë që urgjentisht të hetohen motivet e sulmit dhe kryesi i këtij akti të dal para drejtësisë.

Kërcënimet e tilla për Asociacionin e Gazetarëve të Kosovës janë tërësisht të papranueshme, të cilat e cenojnë rëndë lirinë e shprehjes dhe rrezikojnë klimën e të bërit gazetari në Kosovë. /Reporteri.net/