Policia e Kosovës gjatë ditës së sotme ka zhvilluar një operacion policor në Prishtinë.
Përmes një njoftimi për media policia ka bërë të ditur se ky operacion policor ka përfshirë tri lokacione të ndryshme të rajonit të Prishtinës, atë të Kodrës së Trimave, Velanisë dhe Matiqanit, me ç’rast janë arrestuar katër persona si të dyshuar për përfshirje në veprën penale ‘falsifikim i dokumenteve’, shkruan Reporteri.net.
Njoftimi i plotë i policisë
Me datën 31/05/2019 në orët e hershme të mëngjesit, Policia e Kosovës përmes Drejtorisë për Hetimin e Krimeve Ekonomike dhe Korrupsionit, bazuar në urdhëresën e Gjykatës Themelore në Prishtinë, ka realizuar një operacion policor në rajonin e Prishtinës, i cili ka rezultuar me arrestimin e katër (4) personave të dyshuar për përfshirje në veprën penale ‘falsifikim i dokumenteve’ neni 390.
Ky operacion policor ka përfshirë tri lokacione të ndryshme të rajonit të Prishtinës, atë të Kodrës së Trimave, Velanisë dhe Matiqanit, ku gjatë kontrollit nga të dyshuarit janë sekuestruar:
1. Veturë Opel Astra,
2. Tre telefona SAMSUNG,
3. Dy pasaporta të Republikës së Kosovës,
4. Një librezë e veturës zvicerane.
Me vendim të prokurorit kompetent personat e dyshuar dërgohen në ndalim për 48 orë, për veprën penale ‘falsifikim i dokumenteve’.
