Ministri në detyrë i Kulturës, Rinisë dhe Sportit, Kujtim Gashi, ka pritur në takim familjen e aktorit Hadi Shehu, me ç‘rast i ndau pullën postare me figurën e tij, si shenjë respekti për punën dhe kontributin e dhënë nga aktori Shehu.

“Sot është një ditë shumë e rëndësishme për të gjithë ne, pra, lansimi i pullës postare dedikuar aktorit Hadi Shehu, duke vlerësuar lart figurën e tij në art”, tha ministri Gashi.

Ndërkaq familjarët e aktorit Shehu falënderuan ministrin Gashi për iniciativën e marrë, duke shprehur mirënjohjen për kujdesin e treguar institucional ndaj tij.

Hadi Shehu ndërroi jetë në vitin 2017, në moshën 68-vjeçare. Ishte i angazhuar në teatrin e Gjakovës, fillimisht si amator, aktron në moshën e re si nxënës. Ishte njëri prej themeluesve të Teatrit Profesionist në Gjakovë dhe njëherësh edhe drejtor i këtij teatri deri në vitin 2007.

Kishte diplomuar në Shkollën e Lartë Pedagogjike në Prishtinë, më 1974, në degën e Artit dramatik, klasa e Faruk Begollit.

Në skenën e Teatrit të Gjakovës ka realizuar me qindra role në drama të ndryshme, ndër to edhe “Fisheku në pajë “, “Njeriu me top”, “Epoka para Gjyqit “, ” Monserati “, “Kur shpirti ndërron jetë”.

Ka luajtur në shumë filma artistik, si “Gjurmë të bardha” (1980), “Kur pranvera vonohet” (1979), “Era dhe lisi” (1979).