Lideri i Lëvizjes Vetëvendosje, Albin Kurti, ka kujtuar jetën dhe veprën e artistit të madh shqiptar, Adem Mikullovci.

Përmes një postimi në rrjetin social Facebook, Kurti tha se nuk ka takuar njeri mendërisht më aktiv, shkruan Reporteri.net.

Sipas tij, Mikullovci moti është ballafaquar me vdekjen dhe ka kohë që ka bashkëjetuar me të.

Kurti e vlerëson atë si artist të angazhuar, regjisor, skenarist, aktor të dhe gjithçka në skenë e në film.

Ish-kryeministri Kurti, rrëfen se për të mbetet i paharrushëm me filmin “Një pallto për babain tim në burg” dhe vështirësitë për xhirimin e atij filmi nën okupimin serb.

Ai konsideron se për secilin film, dramë e komedi të Adem Mikullovcit, mund të bëhet një film, dramë a komedi tjetër mbi peripecitë e realizimit.

Kurti flet edhe për kohën kur Mikullovci ishte anëtar i VV-së, due thënë se pjesëtarët e partisë e kishin shok e gjysh, koleg e prind dhe se entuziazmi i tij ishte inspirues për ta.

Kurti Mikullovcin e ka quajtur “Çaplini ynë”.

Adem Mikullovci vdiq sot në orën 00:20, menjëherë pas mesnatës.

Varrimi i tij do të bëhet në ora 16:00 në varrezat e qytetit në Prishtinë, ndërsa para Teatrit Kombëtar është vendosur fotografia e tij për homazhe.

Ky është postimi i tij i plotë:

Lamtumirë Çaplini ynë!

Moti është ballafaquar me vdekjen, ka kohë që ka bashkëjetuar me vdekjen. Njeri mendërisht më aktiv nuk kam takuar. Ai nuk mund të mos mendonte vazhdimisht. Aq i gjallë ishte saqë vetëm papritmas mund të vdiste. Sot, në ditën ndërkombëtare të demokracisë, u nda prej nesh Adem Mikullovci, deputeti i të dy republikave të Kosovës: i asaj të Deklaratës Kushtetuese të 2 korrikut 1990, pra përfaqësues i republikës-për-rezistencë; dhe, i asaj të 17 shkurtit 2008, në legjislaturën e gjashtë të pasluftës në Kosovë.

Para së gjithash, Adem Mikullovci ishte artist i angazhuar. Regjisor, skenarist, aktor, të gjitha dhe gjithçka në skenë e në film. Shumë herë i arrestuar e i maltretuar nga policia serbe gjatë viteve ’90. Për mua është i paharrueshëm me filmin “Një pallto për babain tim në burg” dhe vështirësitë për xhirimin e atij filmi nën okupim. Mbase për secilin film, dramë a komedi të Adem Mikullovcit mund të bëhet edhe një film, dramë a komedi tjetër mbi peripecitë e realizimit.

Vitin e kaluar m’i dha veprat e tij tejet të vlefshme “Oda e Junikut”, “Qëndresa” si dhe burleskat fantastike nga vitet 2005 dhe 2006.

Adem Mikullovcin në Lëvizje e kishim shok e gjysh, koleg e prind. Entuziazmi i tij për neve ishte inspirues. Kujtimi ynë për të është i pashlyeshëm.

Jetoi sipas vetes, për të tjerët. Prehu i qetë Baca Adem. Nderime përjetë Çaplini ynë.