Ambasadori i Shteteve të Bashkuara të Amerikës në Serbi, Christopher Hill ka komentuar rreth zhvillimeve të fundit në bisedimet mes Kosovës dhe Serbisë dhe vizitën e emisarit amerikan Gabriel Escobar në Kosovë.

Hill ka thënë se Escobar ka dërguar porosi mjaft të ashpra. Sipas ambasadorit amerikan në Serbi, dinari është problem i madh për momentin, por çështja thelbësore është Asociacioni i komunave serbe.

“Megjithatë, ajo që është ngushëlluese është se të gjithë e kuptojnë se është e nevojshme të zgjidhet ky problem. Negociatori amerikan për Ballkanin, Gabriel Escobar, ishte në Kosovë dhe i dërgoi mesazhe mjaft të ashpra dhe të qarta lidershipit kosovar. Duhet të zgjidhen disa probleme dhe çështja e heqjes së dinarit është më e freskëta dhe ndoshta më e vështira”, ka thënë Hill për Euronews Serbia.

“Megjithatë, çështja themelore që duhet të zgjidhet dhe për të cilën tashmë është rënë dakord në të kaluarën është Asociacioni i Komunave Serbe. Me themelimin e atij Asociacioni do të zgjidhen të gjitha problemet tjera si strukturat paralele apo përdorimi i dinarit. Çështja është vetëm kur, jo nëse do të ndodhë. Logjika është shumë e qartë, të dyja palët tashmë kanë rënë dakord për këtë, kjo është ajo që dëshiron BE-ja dhe do të realizohet”, ka thënë ambasadori amerikan në Beograd.