Ambasadori Hovenier për gazsjellësin: Qeveria e Kosovës nuk ishte në gjendje të merrte vendime për rrugën e saj të ardhshme

Ambasadori i Shteteve të Bashkuara të Amerikës (SHBA) në Kosovë, Jeff Hovenier, ka folur rreth çështjes së refuzimit të gaz-përçuesit amerikan.

Hovenier tha se Qeveria e Kosovës me të drejtë po bën një studim të thellë për energjinë.

“Mendoj se kjo është ndoshta mënyra e gabuar për të karakterizuar atë që ka ndodhur. Ajo që do të thosha është se Korporata e Sfidës së Mijëvjeçarit, MCC, ka një mënyrë shumë unike për të përkufizuar programet e saj të ndihmës së huaj. Hyn në dialog me qeverinë, qeverinë nikoqire kudo që do të punojë dhe së bashku i identifikojnë prioritetet. Ka afate kohore shumë të rrepta dhe proces shumë të ndërlikuar të miratimit. Dhe në fakt, ende po vazhdon procesi për të përkufizuar atë që quhet „Kompakt” i cili është programi i MCC-së që çon përpara. Kishte afate mjaft të rrepta kur u shqyrtua gazi si një element i pjesës energjetike të programit „Kompakt” të MCC-së. Kishte afate kohore mjaft të rrepta për të përcaktuar nëse do të mund të mbështetej apo jo gazi si një element i tij. Qeveria e Kosovës – e cila me të drejtë po bën një studim mjaft të thellë dhe të kujdesshëm se si mund t’i kalojë më së miri burimet e saj të energjisë nga një sistem që mbështetet në dy termocentrale ndotëse me thëngjill të epokës jugosllave në një strukturë të shekullit XXI për të siguruar energji”, ka thënë ai për RTK-në.

Hovenier tha se Qeveria nuk ishte në gjendje që të merrte vendime sa i përket gaz-përçuesit amerikan, për të cilën tha se është dështim.

“Qeveria nuk ishte në gjendje të merrte vendime për rrugën e saj të ardhshme në afatet kohore që kërkon MCC-ja. Kjo jo domosdoshmërish është dështim. Jo domosdoshmërish është diçka që po kritikoj. Thjeshtë është realiteti. Mezi presim që qeveria e Kosovës të marrë disa vendime përfundimtare për strategjinë e saj energjetike. Mirëpresim mundësinë që të mund ta mbështesim. Në ndërkohë, puna e MCC-së duhej të vazhdonte. Programi „Kompakt” i KSM-së, nëse miratohet, do të përmbajë ndihmë shumë të rëndësishme në mbështetje të infrastrukturës energjetike për Kosovën – për ta ndihmuar Kosovën që të ketë furnizim me energji që është i sigurt, i qëndrueshëm, bashkëkohor, i shek. XXI”, ka thënë ambasadori amerikan.

Tutje ai është pyetur se a e kanë diskutuar këtë çështje me kryeministrin Kurti.

“E kemi diskutuar strategjinë për energji dhe dëshirën e SHBA’së për ta ndihmuar për disa vendime shumë të vështira. Për të ndihmuar në pozicionimin e Kosovës në të ardhmen me një furnizim më të mirë të energjisë”, ka thënë në fund Hovenier.