“Taktikë të Aleksandar Vuçiç” i ka quajtur ish-kryediplomati kosovar, Petrit Selimi, deklarimet e presidentit serb se po i ofrohet lejimi i anëtarësimit të Kosovës në Kombe të Bashkuara në këmbim të anëtarësimit të përshpejtuar të Serbisë në Bashkimin Evropian, raporton gazeta online Reporteri.net.

Referuar edhe një propozimi të përfolur si “franko-gjerman”, Selimi tha se ajo është shpikje e Vuçiç’it për të “përgatitur publikun për ‘fitoren’ e madhe në parandalimin e ulëses në OKB”.

“Nuk ka ulëse të premtuar [për Kosovën] në OKB. Kjo është shpikje tipike e Vuçiçit për të përgatitur publikun për ‘fitoren’ e tij të madhe në parandalimin e ulëses në OKB për Kosovën. Ai shpik këso betejash dhe fitoresh”.

“Në këto momente, me Rusinë gjenocidiale dhe Kinën arqimësore në Këshillin e Sigurimit të Kombeve të Bashkuara, shtegu për anëtarësimin e Kosovës në OKB është i ngushtë”, ka shkruar Petrit Selimi në një cicërimë në Twitter.

Kohëve të fundit presidenti serb ka deklaruar se ekziston një propozim i hartuar nga Franca dhe Gjermania sipas të cilës Serbisë i kërkohet të mos e pengojë anëtarësimin e Kosovës në OKB dhe organizata ndërkombëtare, ku si këmbim Serbisë do t’i përshpejtohej anëtarësimi në Unionin Evropian.

Aleksandar Vuçiç e ka quajtur “të papranueshme” për Serbinë një “propozim” të tillë./Reporteri.net/