Paneli Zgjedhor për Ankesa dhe Parashtresa i ka dhënë mundësinë Listes Serbe që të marrë pjesë në zgjedhjet e 19 majit që mbahen në katër komunat veriore të Kosovës.
Ky vendim fare nuk i ka pëlqyer Adnan Rrustemit anëtar i Vetëvendosjes në Komisionin Qendror të Zgjedhjeve.
Ai thotë se lejimi i tre kandidatëve të Listës Serbenë zgjedhjet e Veriut është si me ua financu me para të buxhetit të shtetit fushatën kundër integritetit e sovranitetit të shtetit.
“PZAP nuk më befasoi. Nuk është hera e parë që merr vendime absurde. Ka certifikuar votues të paligjshëm nga Serbia vazhdimisht. Tre kandidatët e Listës Serbe janë refuzuar nga ana e KQZ-së sepse me aktet formale të dorëheqjes, Kosovën e kishin konsideruar pjesë të Serbisë dhe e kishin quajtur “Kosovo i Metohija”.
Në media me pas fol kështu, do të duhej të ju ndalohej kandidimi, e lëre më që kanë dorëzuar aktet e dorëheqjes nga pozita e kryetarëve të komunave, të nënshkruara, të vulosura e të protokoluara. Ky është shpërdorim i pozitës zyrtare kundër vet shtetit”.
“Por, që ta mbrosh integritetin e institucioneve e të shtetit, pa dyshim që paraprakisht duhet të kesh vetë integritet. Kundërshtimi i tre kandidatëve nuk është kundërshtim i pjesëmarrjes së serbëve në zgjedhje. Përkundrazi, refuzimi i tyre është hapje e mundësisë për serbët që e pranojnë Kosovën si shtet dhe nuk lejojnë të përdoren nga Beogradi”.
“Lejimi i këtyre tre kandidatëve të Listës Serbe është si me ua financu me para të buxhetit të shtetit fushatën kundër integritetit e sovranitetit të shtetit.
Ne, si anëtarë të KQZ-së e kemi bërë detyrën tonë ligjore dhe kushtetuese, por edhe shtetërore. I mbetet që të njëjtën ta bëjë edhe Gjykata Supreme dhe Gjykata Kushtetuese. Legjitimimi i këtyre kandidatëve do të ishte legjitimim i akteve të tilla që cenojnë integritetin dhe sovranitetin shtetëror”, ka shkruar ai në Facebook.
Reporteri.net ka qenë mediumi i parë që ka raportuar para se të mbahet mbledhja e KQZ-së se ankesa e partisë serbe është pranuar nga PZAP.
DOKUMENT: Lista Serbe do të marrë pjesë në zgjedhjet në veri, vendos PZAP