Në Kosovë është duke u votuar për zgjedhjet parlamentare 2025. Procesi i votimit ka nisur në ora 07:00, ndërsa qendrat e votimit do të jenë të hapura deri në ora 19:00.

Këtë vit votuesit po identifikohen me një shënjues me marker në gisht, për dallim nga herët e kaluara kur përdorej spreji.

Mirëpo, nga shumë qytetarë ka pasur ankesa se shenja që po bëhet me marker është duke u fshirë lehtësisht.

Gazetarja e gazetës online Reporteri.net me anë të një videoje ka demonstruar se ngjyra mund të fshihet mjaft lehtësisht vetëm me aceton.

Gjatë ditës  edhe Albert Krasniqi nga Demokraci Plus (D+), ka adresuar këtë shqetësim. Ai ka thënë se shënjimi i gishtërinjve me ngjyrë dalluese po fshihet lehtësisht, duke rritur rrezikun e votimit të dyfishtë

“1. Shënjimi i gishtërinjve me ngjyrë dalluese po fshihet lehtësisht, duke rritur rrezikun e votimit të dyfishtë. Kjo përbën një hap prapa krahasuar me praktikën e mëparshme të përdorimit të ngjyrës së padukshme, pasi qytetarët mund të bien pre e presioneve për të votuar ose për të mos votuar”, thotë ai. /Reporteri.net/