Deputetët kanë nisur të shkojnë në Kuvend në përpjekjen e 35-të për ta provuar konstituimin e institucionit ligjvënës.
Para gazetarëve foli deputeti i LDK-së, Arben Gashi i cili tha se Lëvizja Vetëvendosje dhe kreu i saj duhet të gjejnë zgjidhje për situatën e krijuar.
“Veç një parti e ka zgjidhjen, Kurti dhe partia e tij duhet të gjejnë zgjidhjen”, tha Gashi, shkruan Reporteri.net.
Ai tutje tha se është e papranueshme që Kosova ende nuk ka institucione.
“Fatkeqësisht është e turpshme ajo që po ndodh, bota o kallet flakë, e ne po shtyhemi mes vete kush çfarë pozite po merr. Duhet t’i vijë fundi sa më shpejt kësaj situate. Është e papranueshme gjendja në të cilën ka hyrë vendi”, tha Gashi. /Reporteri.net/.
Deputeti i Partisë Liberale Egjiptiane, Veton Berisha, tha se cilido mandatar që do t’i sigurojë 60 vota, ai do ta japë votën e 61-të, për të dalë nga situata e krijuar në Kuvendin e Kosovës.
“Vota ime është e hapur. Ashtu siç kam votuar hapur, do të votojë në secilën formë. Mund ta bëjë publike votën time, sepse nuk ndryshoj. Le t’i bënë 60, i 61 jam unë. Nuk mund të flasë për të tjerët”.
“Ai mandatar që i bënë 60, unë jam i 61. Për mua ka rëndësi shumë dalja nga kjo situatë”, tha Berisha.
Berisha tha se vendimi i Gjykatës Kushtetuese do të mund të bëjë zgjidhjen situatës së bllokuar në Kuvendin e Kosovës.
“Mendoj se vendimi i Gjykatës Kushtetuese nëse nuk janë numrat do të bëjë zgjidhje sepse të njëjtit deputetë janë. /Reporteri.net/.
Deputeti VV-së, Agim Bahtiri, dhe ai i LDK-së, Armend Zemaj, kanë debatuar shkurtimisht jashtë objektit të Kuvendit pas dështimit të serishëm të kosntituimit të Kuvendit të Kosovës.
Bahtiri i VV-së i tha Zemajt se ai dhe kolegët e tij nga LDK duhet të votojnë kur të vijnë në seancë.
“Ne jena ardhë me votue. Ju pse jeni ardhë. Eshtë e turpshme. Jeni ardhë, duhet me votue”, i është drejtuar me zë të lartë Batiri deputetit Armend Zemaj.
Kurse, Zemaj i LDK-së i tha Bahtirit se duhet të lëshojnë radhën, meqë s’janë të aftë ta zgjedhin një kryetar të Kuvendit me 48 vota që i kanë marrë në zgjedhje.
“Mësojeni demokracinë, jo autokracinë”, i tha Zemaj deputetit të VV-së.
Deputeti i Lëvizjes Vetëvendosje, Dimal Basha, ka folur pas dështimit të 35-të me radhë për konstituimin e Kuvendit, duke thënë se partitë deri tash opozitare me mosangazhim dhe obstruksion qëllimshëm po e pengojnë këtë proces.
“Në mëngjes, ne deputetët e LVV-së e kemi ditur se do të vijmë të votojmë. Deputetët e opozitës nuk e dinë pse kanë ardhur – sepse nuk kanë votuar. Janë zgjuar, janë veshur, kanë ardhur në Kuvend dhe janë kthyer në shtëpi pa lënë asnjë shenjë të angazhimit”, ka thënë Basha.
Sipas tij, deputetët e opozitës po e bojkotojnë konstituimin e Kuvendit, duke penguar formimin e institucioneve dhe duke shpërfillur përgjegjësinë që kanë ndaj votuesve.
“Jemi përgjegjës të gjithë për konstituimin e Kuvendit, meqenëse jemi të gjithë hisedarë. Por të gjithë deputetët e LVV-së po votojnë ‘për’. Kjo është puna jonë. Po të njëjtën gjë duhet ta bëjnë edhe deputetët e opozitës”, theksoi ai.
Ai ka thënë se vetëm pas konstituimit të Kuvendit mund të matet në mënyrë legjitime se kush i ka numrat për të formuar qeverinë.
Deputetja e AAK-së, Time Kadrijaj, ka thënë se Lëvizja Vetëvendosje po e zvarrit qëllimshëm konstituimin e Kuvendit.
“Nuk mund të pranojmë abuzimin që po e bën VV-ja në vazhdimësi, që për 35 herë me radhë të mos konstituohet Kuvendi. Po e shohim se qëllimshëm janë duke e bërë”, ka deklaruar Kadrijaj.
Sipas saj, konstituimi i Kuvendit do të mundësonte funksionalizimin e komisioneve parlamentare dhe mbikëqyrje më efektive të punës së qeverisë, veçanërisht në çështje jetike për vendin si kriza e energjisë dhe ajo ekonomike.
“Nëse konstituohet Kuvendi, vazhdojmë me komisione parlamentare dhe do të kishim pasur një mbikëqyrje më të mirë të qeverisjes, dhe të mos kemi abuzime të tilla, siç është duke ndodhur me këtë krizën e energjisë, krizën ekonomike sepse do të kishim zhvilluar debate të qarta për krejt këto se çka po ndodhin”, tha ajo pas dështimit të përpjekjes së 35-të për të konstituar Kuvendin.
Përpjekja e 36-të do të mbahet të hënën nga ora 11:00. /Reporteri.net/.
Deputeti i LDK-së, Besian Mustafa është deklaruar pas dështimit të 35-të për konstituimin e Kuvendit të Kosovës.
Ai tha se përgjegjësia e plotë bie mbi Lëvizjen Vetëvendosje.
“Partia që ka shumicën nuk arriti të sigurojë as sot votat e mjaftueshme. Konform Kushtetutës, partisë që del e para në zgjedhje i takon ekskluzivisht të nominojë kryetarin e Kuvendit dhe i takon përgjegjësia për të siguruar votat”, ka thënë ai.
Ai foli edhe për krizën e fundit në sektorin e energjisë.
Mustafa theksoi se Kosova është në prag të një krize serioze për shkak të mungesës së kapaciteteve prodhuese dhe varësisë në rritje nga importi
“Në rrethana normale prodhimi vendor është rreth 800 megavat, ndërsa për momentin kemi vetëm 110. Pjesa më e madhe po importohet. VV-ja ka kundërshtuar vazhdimisht ngritjen e kapaciteteve të reja energjetike, duke e lënë Kosovën në kushte të rënda të varësisë energjetike”, u shpreh Mustafa.
Ai shtoi se përfituesit kryesorë nga ky import energjie janë njerëz të afërt me Vetëvendosjen, ku përmendi Marin Berishajn.
“Kriza politike, energjetike dhe ekonomike është rezultat kryekëput i veprimeve apo mosveprimeve të LVV-së”, tha ai. /Reporteri.net/.
Sekretarja e Partisë Demokratike të Kosovës, Vlora Çitaku ka folur për media pas dështimit të 35’të për ta konstituuar Kuvendin.
Çitaku i bëri thirrje publike Lëvizjes Vetëvendosje për reflektim, duke shtuar se Kosova është buzë kolapsit.
Ndër tjerash, deputetja e PDK-së tha se egoja e Kurtit është më e madhe se Kosova.
“Për Albin Kurtin pushteti është më i rëndësishëm se shteti, egoja është më e madhe se Kosova, ambicia është më e rëndësishme se demokracia, kjo situatë duhet të marrë fund dhe presim nga VV që të reflektojë”, tha Çitaku.
Deputetja e PDK-së paralajmëroi për pasojat e rënda që po i shkaktohen vendit nga vonesat në ndërtimin e institucioneve të reja.
“Kosova është buzë kolapsit. Çdo ditë kemi lajme për dëmin e pariparueshëm që kjo situatë po i shkakton ekonomisë. Dje pamë lajme të frikshme për krizën buzë kolapsit në sektorin e energjisë”, theksoi Çitaku.
Seanca është shtyrë për të hënën në ora 11:00. /Reporteri.net/.
Ka dështuar edhe përpjekja e 35-të për konstitutuimin e Kuvendit.Lëvizja Vetëvendosje as sot nuk i kishte numrat për ta ndryshuar formën e votimit për zgjedhjen e Kryetarit të Kuvendit, në votim të fshehtë, shkruan Reporteri.net.
Partitë tjera, si PDK, LDK, AAK dhe Lista Serbe s’kanë propozuar fare anëtarë për Komisionin për votim të fshehtë.
“Nuk ka propozime”, deklaroi Kryesuesi Avni Dehari.
Kur është hedhur në votim përbërja e komisionit, ata s’kanë marrë pjesë fare në proces.
“51 deputetë për, kundër një, abstenime s’ka. Nuk ka kuorum. Shihemi më 23.06.2025 në orën 11:00”, tha Dehari.
Në dështim të votimit të Komisionit, Dehari ka ndërprerë seancën.
E propozuara e VV’së për këtë pozitë vazhdon të mbetet Albulena Haxhiu./Reporteri.net./
Kryetari i Nisma Socialdemorakte, Fatmir Limaj, ka thënë para fillimit të seancës se për tema nacionale duhet të ulet dhe të bisedohet për të gjetur zgjidhje
Ai tha se është e habitshme çfarë po ndodh tash e sa muaj.
“Kjo është e habitshme çka po ndodh. Me u zgjedh, me kërku me bo vendin më mirë, e me bë tërë atë fushatë, me garu kush është më patriot, e me ta dhënë populli besimin, e mos me qenë në gjendje me u ul grupet politike me ndërtu qeveri, parlament e institucione – në kohën kur bota është trazuar, në krizë ekonomike të madhe,” u shpreh Limaj.
Ai tha se situata e tanishme nuk mund të vazhdojë pa pasoja dhe kërkoi një reflektim të përgjithshëm.
“Në krejt këtë situatë, apeli im te qytetarët është: shikoni kujt po ia jepni besimin. Është koha me adresu përgjegjësinë”, tha ai. /Reporteri.net/.
Kuvendi i Kosovës do të mblidhet edhe sot në përpjekjen e 35-të për konstituim të legjislaturës së nëntë parlamentare të dalë nga zgjedhjet e 9 shkurtit.
Seanca është caktuar të nisë nga ora 10:30.
Në seancën e para dy ditëve, mungoi kuorumi për formimin e një komisioni për votim të fshehtë për zgjedhjen e kryeparlamentarit që e propozoi kryesuesi i seancës, Avni Dehari.
Kjo ishte hera e 26-të që dështoi formimi i këtij komisioni përmes të cilit partia e parë fituese, Lëvizja Vetëvendosje, synoi të zëvendësojë hedhjen në votim të kandidates së tyre për kryeparlamentare, Albulena Haxhiu, meqë për disa seanca radhas s’arriti t’i merrte votat e nevojshme.
Partia Demokratike e Kosovës, Lidhja Demokratike e Kosovës, Aleanca për Ardhmërinë e Kosovës dhe Lista Serbe nuk propozuan nga një anëtar për formimin e këtij komisioni.
Edhe pas dështimit të 34-të partitë politike në prononcimet pas seancave nuk dhanë shenja se do të ketë ndryshim qëndrimesh.
Reporteri.net është gazetë online e lajmeve nga vendi dhe bota. Qëllim kryesor ka informimin e drejtë, të paanshëm dhe të shpejtë. Reporteri.net, në pronësi të “R Media L.L.C.”, është themeluar në mars të vitit 2019 dhe drejtohet nga gazetarët Bekim Kabashi dhe Mentor Gjergjaj.
E-Mail: info@reporteri.net
Marketing: marketing@reporteri.net
Adresa: Rr. UÇK, Nr. 102/11 10000 Prishtinë, Kosovë
