Policia e Kosovës ka arrestuar tre persona nën dyshimin për përfshirje në veprat penale “Mundësim apo detyrim në prostitucion”, “Ofrim i lokaleve për prostitucion” dhe “Bashkëkryerje”.

Sipas njoftimit të policisë, pas një hetimi nga drejtoria për hetimin e trafikimit me qenie njerëzore, më datën 21 dhjetor rreth orës 17:35, janë arrestuar një person i gjinisë mashkullore dhe dy persona të gjinisë femërore lidhur me veprat e lartëcekura.

Njësitet kompetente të policisë kanë vazhduar realizimin e detyrave ku kanë kontrolluar lokalin i cili gjendej në rrugën “Muharrem Fejza” në Prishtinë si dhe janë konfiskuar si prova materiale, pajisje elektronike, katër telefona mobil.

Personat e dyshuar, janë shoqëruar në stacion policor dhe pas intervistimit me vendim të prokurorit të rastit iu është caktuar masa e ndalimi për 48 orë.