Personi me inicialet A.B., është prangosur sot në Pejë nën dyshimin për vrasjen e Senad Gogut i lindur në vitin 1959, që kishte ndodhur në shtator të këtij viti.

Viktima kishte ndërruar jetë si pasojë e plagëve të shkaktuara nga mjeti i mprehtë-thika, ndërsa krimi dyshohet se ishte kryer në shtëpinë e tij.

Lajmin për arrestimin e të dyshuarit, e ka konfirmuar për Gazetën Express prokurorja Valbona Dishaj-Haxhosaj.

Prokurorja Dishaj-Haxhosaj tha se i dyshuari do të dërgohet në mbajtje për 48 orë dhe për të do të kërkohet edhe caktimi i masës së paraburgimit.

“Sot është arrestuar një person i dyshuar, me incialet A.B nga Peja, i dyshuar për veprën penale ‘vrasje e rëndë’ ndaj viktimës Senad Gogu. Vrasja ka ndodhur më 05.09.2020. Arrestimi i tij është bërë në bashkëpunim me hetimet rajonale në Pejë. Pra, pas një punë operative që kemi bërë, kemi arritur ta identifikojmë dhe arrestojmë të dyshuarin”, tha prokurorja.

E pyetur se cili dyshohet të jetë motivi i kësaj vrasjeje, prokurorja tha se “është herët të flitet”, teksa shtoi se mjeti i mprehtë-thika është përdorur për kryerjen e vrasjes, në shtëpinë e viktimës.

Kujtojmë se me urdhër të prokurores Valbona Dishaj-Haxhosaj, ditë më parë ishte arrestuar edhe kryetari i komunës së Istogut, Haki Rugova, nën dyshimin për keqpërdorim të detyrës zyrtare.