Policia e Shqipërisë ka arrestuar një 19-vjeçar nga Kosova i cili drejtonte automjetin pa leje drejtimi dhe gjatë kontrollit fizik iu gjet edhe një armë zjarri.

Nga verifikimet, policia ka zbuluar se i njëjti ka qenë në kërkim në Kosovë për “vrasje e mbetur në tentativë”.

“Shtetasi U. A., nga verifikimet e mëtejshme të kryera nga Interpol Tirana, në bashkëpunim me ILECU Kosovë, ka rezultuar se ishte person në kërkim për llogari të Kosovës, për veprën penale ‘Vrasja e mbetur në tentativë’”, shkruan Policia e Shtetit në Facebook.

Gjykata Themelore në Prishtinë kishte nxjerrë urdhërarrestin për të dyshuarin, ndërsa tash i është dërguar Interpol Tiranës për ta ekstraduar në Kosovë.

19-vjeçari në shtator të 2020-s, në një spital në Prishtinë kishte goditur me thikë, në tentativë për ta vrarë, një doktor të spitalit duke e plagosur rëndë, sqarohet nga detajet e dhëna nga policia.

“Sqarojmë se shtetasi U. A., në momentin e ndalimit nga ana e Policisë Rrugore, për kontrollin e dokumentacionit, ka braktisur mjetin dhe ka tentuar të largohet me vrap, por është kapur së bashku me armën e zjarrit, gjatë ndjekjes nga patrullat e përgjithshme të Komisariatit të Policisë Nr. 4 Tiranë”, thuhet tutje.

Ndërkaq, Policia e Shqipërisë ka publikuar videon e momentit kur ka arrestuar shtetasin kosovar.