Kryesuesi i seancës konstituive të Kuvendit të Kosovës, Avni Dehari i ka dërguar letër Presidentes së Kosovës, Vjosa Osmani, për t’i kërkuar interpretim mbi situatën e krijuar në seancën e djeshme, shkruan Gazeta Online Reporteri.net.
Në letrën e siguruar nga Gazeta Online Reporteri.net, Dehari kërkon nga Osmani “sugjerime për opsionet e mundshme përpara”.
Në letër, Dehari shpjegon dhe arsyet pse u detyrua të ndërpriste seancën.
“E nderuara Shkelqësia juaj, Znj. Vjosa Osmani Sadriu, Presidente e Republikës së Kosovës,
Ju drejtohem në cilësinë e kryesuesit të seancës konstituive të Kuvendit të Republikes Kosovës për legjislaturën e IX-të. Në përputhje me Rregulloren e Kuvendit, rendi i ditës për seancën e djeshme konstituive ishte:
– Formimi i Komisionit të Përkohshëm për Verifikimin e Kuorumit dhe të Mandateve,
– Betimi i deputetëve,
-Zgjedhja e Kryetarit të Kuvendit,
– Zgjedhja e nënkryetarëve të Kuvendit.
Lidhur me pikën e parë, për njoftimin tuaj, Raporti i Komisionit për verifikimin e kuorumit dhe mandateve, u votua me shumicë të votave në Komision, mirëpo si asnjëherë më parë, ky Raport, nuk e mori mbështetjen e shumicës në Kuvendin Republikës së Kosovës. Rrjedhimisht, mandatet nuk u verifikuan dhe betimi i deputetëve nuk procedoi.
Në pamundësi të votimit të raportit për verifikimin e mandateve, në cilësinë e Kryesuesit e kam ndërprerë seancën konstituive. Në këto rrethana, të një situate të paprecedent, unë ju drejtohem juve si Presidente e Republikës për sugjerime për opsionet e mundshme përpara”, thuhet në letrën e siguruar nga Reporteri.net.
Se letra ka arritur në Presidencë e ka konfirmuar për Reporteri.net këshilltari i Osmanit, Bekim Kupina.
“Letra sapo ka ardhë në Presidencë dhe ekipi ligjor i Presidencës është duke e analizuar, për t’i propozuar Presidentes hapat e mëtejmë”, ka deklaruar Kupina.
/Reporteri.net/
Reporteri.net është gazetë online e lajmeve nga vendi dhe bota. Qëllim kryesor ka informimin e drejtë, të paanshëm dhe të shpejtë. Reporteri.net, në pronësi të “R Media L.L.C.”, është themeluar në mars të vitit 2019 dhe drejtohet nga gazetarët Bekim Kabashi dhe Mentor Gjergjaj.
E-Mail: info@reporteri.net
Marketing: marketing@reporteri.net
Adresa: Rr. UÇK, Nr. 102/11 10000 Prishtinë, Kosovë
