Arion Thaqi, me profesion arkitekt dhe kryetar i demokristianëve të rinj të Kosovës, sot i është bashkuar Lëvizjes Vetëvendosje dhe do të jetë në listën garuese për deputet në zgjedhjet e parakohshme që do mbahen më 14 shkurt.

Këtë e ka bërë të ditur lideri i VV-së, Albin Kurti, i cili përmes një postimi në rrjetin social Facebook i thuri lavde aderimit të fundit në parti, shkruan Reporteri.net.

Por njëjtë nuk veproi edhe me zyrtarizimin e bashkëpunimit me presidenten në detyrë, Vjosa Osmani.

Kurti e Osmani dje përmes një konference për medie zyrtarizuan koalicionin parazgjedhor, ku kjo e fundit bëri të ditur se do të garojë në një listë të përbashkët me VV-në.

Por Kurti nuk e shkroi asnjë rresht të vetëm lidhur me këtë në llogaritë e tij në rrjetet sociale.

Marrëveshja mes Lëvizjes Vetëvendosje dhe iniciativës së Vjosa Osmanit përmban 10 zotime i pari nga të cilët është vettingu në sistemin e drejtësisë dhe lufta e pakompromis kundër korrupsionit dhe krimit të organizuar.

Ky është postimi i plotë i Kurtit për aderimin e Arion Thaqit:

Arion Thaqi është i lindur në Prishtinë në vitin 1982, dhe, ka përfunduar studimet në Universitetin e Prishtinës në Fakultetin e Ndërtimtarisë dhe Arkitekturës. Më pas vijoi studimet në Romë të Italisë në Sapienza Universita Di Roma duke specializuar në degën planifikim, menaxhim e projektim të objekteve spitalore dhe shëndetësore. Që nga viti 2007, Aroni punon si arkitekt në projekte e bashkëpunime me kompani të ndryshme. Arioni është kryetar i demokristianëve të rinjë të Kosovës. U takuam bashkë edhe me kryetarin e subjektit, Dr. Ukë Berisha. Arion Thaqi do të jetë në listën garuese të Lëvizjes VETËVENDOSJE! për deputet të ardhshëm në legjislaturën e tetë të Kuvendit të Republikës së Kosovës.

/Reporteri.net