Zëvendëskryeministri i parë i Kosovës, Besnik Bislimi, gjatë vizitës zyrtare në Athinë, ditën e djeshme ka takuar ndaras deputetët Dora Bakoyannis dhe George Papandreou.

Përgjatë këtyre takimeve, zëvendëskryeministri Bislimi potencoi se Kosova vazhdon drejt rrugës së progresit, duke e pozicionuar vendin në një trajektore të zhvillimit dhe demokracisë.

“Si dëshmi më të fundit të këtij indikatori, kemi raportin e demokracisë të institutit V-Dem, ku Kosova renditet e para në rajonin e Ballkanit Perëndimor”, njofton Zyra e Kryeministrit.

Zyra e Kryeministrit njofton se bisedat e zhvilluara u fokusuan dhe në rrugëtimin në proceset e integrimit europian të Kosovës dhe aplikimet për anëtarësim në BE dhe në Këshillin e Evropës, e po ashtu dhe në lidhje me marrëdhëniet Kosovë-Greqi. Kosova synon të forcojë miqësinë dhe partneritetin me Greqinë.

Me deputetët Bakoyannis dhe Papandreou, Bislimi bisedoi dhe mbi procesin e dialogut, zhvillimet dhe takimin e fundit në Bruksel.  /Reporteri.net/.