Me një ceremoni ushtarake 350 rekrutëve të rinj të Forcës së Sigurisë së Kosovës (FSK) janë betuar të premten.

Ata do të shërbejnë në radhët e FSK-së pas trajnimit nëntëjavor në Komandën e Doktrinës dhe Stërvitjes.

“Në praninë e udhëheqësve ushtarakë dhe civilë, përfaqësuesve të institucioneve të Republikës së Kosovës dhe partnerëve ndërkombëtarë, rekrutët e rinj dhanë betimin solemn për shërbim ndaj vendit, duke shprehur gatishmërinë e tyre për të mbrojtur sovranitetin dhe integritetin territorial të Republikës së Kosovës”, thuhet në njoftimin e FSK-së.

Në njoftim thuhet se ceremonia e betimit ka filluar me raportimin para komandantit të FSK-së, gjenerallejtënant Bashkim Jashari, “si akt simbolik i nisjes së një faze të re në jetën ushtarake të të rinjve që kanë zgjedhur t’i shërbejnë atdheut me nder dhe përkushtim”.