Bashkimi Evropian ka pritje të mëdha nga presidenti i ri i SHBA-së, Joe Biden, dhe shpreson që SHBA-ja të riangazhohet në bisedime multilaterale të tregtisë, kanë thënë zyrtarë të BE-së të hënën, raporton agjencia Reuters.

Ministrat e BE-së përgjegjës po takohen përmes një video-konference sot, dy ditë pasi që Demokrati, Joe Biden, ka fituar zgjedhjet në SHBA. Presidenti i SHBA-së, Donald Trump, me të cilin Evropa kishte pasur marrëdhënie të tendosur, nuk e ka pranuar humbjen dhe po ndjek procedurat ligjore për të kontestuar rezultatin e zgjedhjeve të 3 nëntorit.

“Ka pritje të mëdha dhe shpresë se presidenti i zgjedhur amerikan do të drejtojë drejt kthimit në një angazhim multilateral në tregtinë ndërkombëtare dhe se është e mund të tejkalohen konfliktet e kaluara”, ka thënë ministri i Ekonomisë i Gjermanisë, Peter Altmaier.

Shefi i tregëtisë i BE-së, Valdis Dombrovskis ka thënë se Komisioni Evropian, që koordinon politikat e tregëtisë të 27 shteteve anëtare të BE_së, ka bërë disa kontakte joformale me kampin e Bidenit.

“Disa kontakte të para janë bërë, në mesin e tjerave për të diskutuar për çështjet tregtare”, ka thënë Dombrovskis.