Gjykatësi federal i SHBA-së Theodore Chuang ka vendosur që Elon Musk dhe Departamenti i tij i Efikasitetit të Qeverisë ka të ngjarë të kenë përdorur kompetenca jokushtetuese për të shpërbërë Agjencinë e Shteteve të Bashkuara për Zhvillim Ndërkombëtar (USAID).

Vendimi i një gjykatësi të qarkut të SHBA-së në favor të 26 punonjësve aktualë dhe ish-punonjësve të USAID-it kërkon të “shtyjë mbylljen e parakohshme, përfundimtare” të agjencisë, ndërkohë që procesi gjyqësor vazhdon.

Urdhri i tij kërkon që DOGE të rivendosë aksesin në email dhe sistemin për punonjësit aktualë të USAID-it dhe të bllokojë personelin e DOGE nga ndërmarrja e çfarëdo veprimi në lidhje me agjencinë pa lejen e shprehur të një zyrtari të USAID-it me autoritet ligjor.

Ai gjithashtu i urdhëroi ata që të paraqesin një plan për punonjësit që të rihyjnë në zyrën federale nga e cila u dëbuan muajin e kaluar dhe ndaloi ekipin e Musk të angazhohej në çdo punë të mëtejshme “në lidhje me mbylljen e USAID”.

Zëvendës zëdhënësja e Shtëpisë së Bardhë Anna Kelly tha se administrata do të apelojë, duke e quajtur vendimin të gabuar.

“Gjyqtarët mashtrues po minojnë vullnetin e popullit amerikan në përpjekjet e tyre për të penguar Presidentin Trump të zbatojë axhendën e tij”, tha ajo.

Nga ana tjetër, avokatët që përfaqësojnë USAID-in thanë se ky ishte një hap i rëndësishëm.

“Vendimi i sotëm është një fitore e rëndësishme kundër Elon Musk dhe sulmit të tij ndaj USAID-it, qeverisë së Shteteve të Bashkuara dhe Kushtetutës. Ata po veprojnë me sharrë elektrike në vend të bisturisë, duke dëmtuar jo vetëm njerëzit që u shërben USAID-it, por edhe shumicën e amerikanëve që llogarisin në stabilitetin e qeverisë sonë”, shpjeguan ata.