Egjipti ka nisur të ndërtojë një mur me Rripin e Gazës para ofensivës së planifikuar të Izraelit në qytetin kufitar Rafah.

Këtë e konfirmojnë pamjet satelitore të analizuara nga agjencia e lajmeve “Associated Press”.

Egjipti publikisht nuk e ka pranuar ndërtimin e murit, por vazhdimisht ka paralajmëruar Izraelin që të mos dëbojë 1 milion palestinezët që tani janë zhvendosur në Rafah dhe të detyrojë ikjen e tyre në territorin egjiptian, përcjell gazeta online Reporteri.net.

Mirëpo autoritetet egjiptiane kanë nisur të marrin masa dhe dëbimi i palestinezëve në drejtim të Egjiptit mund të kërcënojë edhe marrëveshjen e paqes mes Izraelit dhe Egjiptit të vitit 1979.

Në pamjet satelitore të shkrepura të enjten, shihet ndërtimi i murit të gjatë 3.5 kilometra në perëndim të kufirit me Gazan.

Në këto pamje shihen kamionë dhe barrikada përgjatë rrugës.