Me liderët evropianë që ranë dakord për tre emrat për të plotësuar postet kryesore të BE-së, motorët janë vënë në lëvizje për pesë vitet e ardhshme në pozitat kyçe në Bashkimin Evropian. Çfarë pason?

Në një takim më të shkurtër se sa pritej, liderët e 27 vendeve anëtare të BE-së miratuan kandidatët për postet kryesore të bllokut: Ursula von der Leyen si presidente e Komisionit Evropian, António Costa si president i Këshillit Evropian dhe Kaja Kallas si Përfaqësuese e Lartë për Politikën e Jashtme dhe Sigurinë.

Miratimi ishte hapi i parë i një mekanizmi që do të fillojë të punojë për të lidhur të gjitha nyjet e lira në përbërjen e lidershipit të ardhshëm të Bashkimit Evropian, raporton Euronews.

Zgjedhja e António Costa nga Këshilli është përfundimtare dhe ai do të marrë detyrën nga presidenti aktual Charles Michel më 1 dhjetor.

Kallas dhe Von der Leyen, megjithatë, kanë ende nevojë për miratimin e Parlamentit Evropian përpara se të emërohen zyrtarisht, transmeton gazeta online Reporteri.net.

Ish-kryeministrja e Estonisë,  Kaja Kallas do të dalë para komisionit të Punëve të Jashtme të Parlamentit, ku do të ketë nevojë për mbështetjen e shumicës së anëtarëve në një votim, të planifikuar për në shtator, që do ta konfirmojë atë si Përfaqësuese e Lartë e BE-së për Punët e Jashtme dhe Politikën e Sigurisë. “Do të jetë qëllimi im që tani të kontaktoj me eurodeputetët dhe të arrij mbështetjen e tyre,” tha ajo në një postim X pas takimit të Këshillit.

Udhëheqësja aktuale Ursula von der Leyen do të përballet gjithashtu me një votim në Parlament, por ajo duhet të fitojë shumicën absolute  në seancë plenare përpara se t’i jepet drita jeshile për të rifilluar pozicionin e saj si kryetare e Komisionit Evropian.

Votimi është planifikuar për seancën plenare të 16-19 korrikut në Strasburg, ku asaj do t’i duhet të sigurojë 361 vota nga gjithsej 720 eurodeputetë që përbëjnë Parlamentin e sapozgjedhur. Votimi do të bëhet me votim të fshehtë, duke e bërë të vështirë vlerësimin paraprak të mbështetjes së dhomës.

Megjithatë, liderët e tri grupeve më të mëdha politike në mandatin e fundit – Partia Popullore Evropiane (EPP), Socialistët dhe Demokratët (S&D) dhe Renew Europe – kanë rënë dakord tashmë për emërimin e saj, që do të thotë se shumica e deputetëve të tyre ka të ngjarë të votojnë në favor. Për të siguruar votat e nevojshme, Von der Leyen tha se do t’u drejtohej delegacioneve dhe deputetëve individualë jashtë këtij koalicioni kryesor.

“Unë gjithashtu do të punoj intensivisht me delegacionet kombëtare sepse përvoja tregon se … brenda grupeve ka modele të ndryshme votimi,” tha von der Leyen pas marrëveshjes së Këshillit.

Një aleat i mundshëm në votim janë të Gjelbrit, me 54 eurodeputetë që grupi ka thënë se është i hapur për negociata.

“Ne mendojmë se mënyra e vetme për të krijuar një shumicë të qëndrueshme pro-evropiane, pro-demokratike dhe pro-ukrainase është nga katër partitë,” tha bashkë-presidenti i të gjelbërve, Bas Eickhout pas zgjedhjeve në fillim të këtij muaji. Ai shtoi se e vetmja mënyrë për krijimin e një mazhorance të qëndrueshme është përfshirja e një pale të katërt në marrëveshje.

Grupi, megjithatë, vendosi një vijë të qartë të kuqe përpara se të fillonte bisedimet dhe deklaroi se ata nuk do të hynin në asnjë lloj pakti politik që përfshin grupin ECR të Giorgia Melonit.

Socialistët gjithashtu refuzuan të hynin në një marrëveshje koalicioni me ndonjë grup të ekstremit të djathtë, qoftë ECR apo ID. P

Eurodeputetët e Fratelli d’Italia të Georgia Melonit mund të ofrojnë gjithashtu mbështetje për von der Leyen, por nëse ata do ta bëjnë këtë mbetet pikëpyetje. Fakti që Meloni abstenoi në Këshill në lidhje me emërimin e von der Leyen – në vend që ta refuzonte atë plotësisht, siç bëri për emërimet e Kostës dhe Kallas – sugjeron që kryeministrja italiane e ka lënë derën e hapur për këtë çështje.

Nëse Ursula von der Leyen merr mbështetjen e Parlamentit në korrik, ajo do të fillojë të punojë për përbërjen e Komisionit të saj të ardhshëm Evropian.

Ndërsa nuk ka emra ende përfundimtarë, disa vende kanë paraqitur kandidatët e tyre për poste. Ky është rasti i Francës, pasi presidenti Macron u shpreh dje pas mbledhjes së Këshillit se dëshira e tij është të riemëroj komisionerin aktual francez Thierry Breton.

Irlanda njoftoi gjithashtu në fillim të kësaj jave synimin e saj për të emëruar ministrin e financave Michael McGrath për të zëvendësuar komisioneren Mairead McGuinness si përfaqësuesin irlandez në ekzekutiv.

Ministri i Punëve të Jashtme të Lituanisë,  Gabrielius Landsbergis u emërua gjithashtu nga vendi i tij për postin dhe ka marrë mbështetje nga Manfred Weber, kreu i PPE. /Reporteri.net/