Dritat u rikthyen në jetë në pjesën më të madhe të Spanjës dhe Portugalisë të martën, pas një ndërprerjeje masive që goditi gadishullin Iberik, duke bllokuar pasagjerët në trena dhe ashensorë, ndërsa miliona humbën qasje në telefona dhe internet.

Energjia elektrike ishte rikthyer në gati 90% të Spanjës kontinentale deri në orët e para të së martës, tha operatori i rrjetit REE. Energjia elektrike u rikthye gjatë natës për rreth 6.2 milion familje në Portugali nga 6.5 milion, sipas operatorit kombëtar të rrjetit të energjisë elektrike. Dritat u ndezën gjithashtu përsëri në Madrid dhe në kryeqytetin e Portugalisë, Lisbonë, raporton the Guardian.

Vetëm një cep i gadishullit, i cili ka një popullsi të përbashkët prej gati 60 milion banorësh, i shpëtoi ndërprerjes. Por ende nuk është zbuluar asnjë shkak i qartë për ndërprerjen.

Kryeministri portugez, Luis Montenegro, tha se burimi i ndërprerjes ishte “ndoshta në Spanjë”. Kryeministri i Spanjës, Pedro Sánchez, tha se të gjitha shkaqet e mundshme po analizoheshin dhe paralajmëroi publikun të mos spekulonte për shkak të rrezikut të “dezinformimit”.

Më parë, operatori i rrjetit të Portugalisë, REN, errësirën ia atribuui ndryshimeve ekstreme të temperaturës.

Në skena që kujtojnë ndërprerjen e vitit 2003 që shkaktoi ndërprerje të gjera të energjisë në verilindje të SHBA-së, shërbimet hekurudhore në të gjithë gadishullin Iberik u ndaluan, trafiku ajror u ndërpre dhe semaforët u shuan. Qindra njerëz u desh të shpëtoheshin nga ashensorët e bllokuar.]

Kryetari i bashkisë së Madridit, José Luis Martinez-Almeida, u kishte kërkuar njerëzve të minimizojnë udhëtimet e tyre dhe të qëndrojnë aty ku ishin, duke shtuar: “Është thelbësore që shërbimet e emergjencës të mund të qarkullojnë. /Reporteri.net/