Forcat e Mbrojtjes të Izraelit (IDF) thanë në një deklaratë të shkurtër të hënën se helikopterët e saj aktualisht po godasin territorin libanez, duke mos dhënë detaje më shumë, shkruan CNN, përcjell Reporteri.net.

Sot gjatë ditës, IDF tha se një “numër i dyshuarish të armatosur” që “u infiltruan” në Izrael nga Libani u vranë dhe se ushtarët e IDF po kontrollonin zonën.

Paqeruajtësit e Forcave të Përkohshme të Kombeve të Bashkuara në Liban (UNIFIL) thanë në një deklaratë të hënën se janë raportuar shpërthime pranë Al-Boustan në Libanin jugperëndimor.

UNIFIL tha se shefi i tij i misionit dhe komandanti i forcave, gjeneralmajor Aroldo Lázaro është në kontakt me palët e përfshira, “duke u kërkuar atyre të ushtrojnë përmbajtje maksimale dhe të përdorin mekanizmat e ndërlidhjes dhe koordinimit të UNIFIL për të parandaluar përshkallëzimin e mëtejshëm dhe humbjen e jetëve”.

Komandanti i ushtrisë libaneze, gjenerali Joseph Aoun, u takua të hënën me gjeneralmajorin Aroldo Lázaro për të diskutuar situatën në kufirin jugor, tha ushtria libaneze.