Gjykata Supreme e SHBA-së ka vendosur se gjykatësit individualë federalë nuk kanë autoritet të lëshojnë urdhra ndalues me vlefshmëri në të gjithë vendin. Ky vendim i rëndësishëm juridik i jep një fitore politike ish-presidentit Donald Trump, i cili ka kritikuar prej kohësh ndërhyrjet e gjykatave më të ulëta në axhendën e tij.

Megjithatë, Gjykata nuk dha një përgjigje përfundimtare mbi ligjshmërinë e politikës së Trump që synon të kufizojë të drejtën e shtetësisë automatike vetëm për ata që kanë lindur nga prindër me qëndrim të rregullt ligjor në SHBA.

Vendimi i shumicës konservatore la të hapur mundësinë që urdhrat ndalues kundër kësaj politike të mbeten në fuqi në nivel kombëtar, përderisa betejat ligjore vazhdojnë. Urdhri i propozuar nga Trump do t’u mohonte shtetësinë fëmijëve të lindur në SHBA nga prindër që ndodhen ilegalisht në vend.

Sipas Kushtetutës amerikane, konkretisht Amendamentit të 14-të, çdo person i lindur në SHBA është automatikisht shtetas, një e drejtë e garantuar pas Luftës Civile për të mbrojtur të sapaliruarit nga skllavëria dhe pasardhësit e tyre. Kjo çështje mbetet një pikë e nxehtë debati mes ligjvënësve, gjykatave dhe shoqërisë amerikane.

Në një vendim të Gjykatës Supreme të vitit 1898, gjykata vendosi se të gjithë fëmijët e lindur në territorin amerikan fitojnë automatikisht shtetësinë amerikane me disa përjashtime. Në këto përjashtime bëjnë pjesë fëmijët e diplomatëve që kanë detyrime ndaj një qeverie tjetër, fëmijët e armiqve që ndodhen në SHBA gjatë një pushtimi, fëmijët e lindur në anije të huaja dhe fëmijët e fiseve indigjene sovrane amerikane.

Administrata Trump ka argumentuar se fëmijët e lindur nga persona që nuk janë shtetas amerikanë nuk janë “nën juridiksionin” e SHBA-së – shprehje që gjendet në Amendamentin e 14-të – dhe prandaj nuk kanë të drejtë për shtetësi.