Haiti me shpejtësi është duke u zhytur në anarki. Gjatë fundjavës, dhuna në kryeqytetin Port-au-Prince ka shpërthyer përsëri. Bandat e armatosura rëndë kanë sulmuar Pallatin Kombëtar dhe i kanë vënë flakën Ministrisë së Brendshme me kokteje molotovi.

Këto ngjarje kanë ndodhur pak orë pas sulmit në aeroportin ndërkombëtar, i cili mbetet i mbyllur për të gjitha fluturimet, përfshirë edhe për aeroplanin që po bartte kryeministrin Ariel Henry, raporton BBC.

Ai ka bërë përpjekje që të kthehet në Haiti nga SHBA-ja gjatë javës së kaluar, mirëpo aeroplani nuk ka mundur të ulej. Ai më vonë është refuzuar edhe nga Republika Dominikane, përcjell gazeta online Reporteri.net.

Henry ka mbetur në Puerto Riko dhe e ka të pamundur të kthehet në Haiti.

BE-ja ka evakuuar të gjithë diplomatët nga shteti që kurrë nuk është këndellur që prej tërmetit të fuqishëm të vitit 2010.