Historia e një infermier në dhomën e urgjencës i cili doli pozitiv për COVID-19 pasi mori vaksinën është një gjë që na rikujton se larja e duarve, distancimi shoqëror dhe maskat do të jenë ende thelbësore, edhe gjatë vitit 2021.

Sipas AbcNews, përcjell Telegrafi, Matthew W., një infermier 45-vjeçar në San Diego, mori vaksinën e Pfizer më 18 dhjetor.

Ai kishte thënë për filialin e ABC News në San Diego se i vetmi efekt anësor i vaksinës që ai përjetoi ishte dhimbja e krahut.

Por gjashtë ditë më vonë, pasi punoi një turn në njësinë e pacientëve me COVID-19, Matthew kishte ethe, dhimbje muskulore dhe lodhje.

Dhe një test i spitalit konfirmoi se ai ishte pozitiv për COVID-19.

Skenari nuk është i papritur, mendon Dr. Christian Ramers, një specialist i sëmundjeve infektive në Qendrat Shëndetësore Familjare të San Diegos.

Kjo pasi që pacientët nuk zhvillojnë menjëherë mbrojtje nga COVID-19, pasi të jenë vaksinuar.

“Ne e dimë nga provat klinike të vaksinës që do të duhen rreth 10 deri në 14 ditë që ju të filloni zhvillimin e mbrojtjes nga vaksina”, tha Ramers.

Edhe pas atyre 10 deri 14 ditëve, pacientët ende kanë nevojë për një dozë të dytë vaksine për mbrojtje të plotë.

“Ajo dozë e parë mendojmë se ju jep diku rreth 50% mbrojtje dhe ju duhet ajo dozë e dytë për të arritur deri në 95%”, shtoi Ramers.

Ai ka përmendur edhe një mundësi tjetër: Meqenëse periudha e inkubacionit për COVID-19 mund të jetë e gjatë për 14 ditë, është gjithashtu e mundur që Matthew të jetë infektuar para se të merrte vaksinën më 18 dhjetor.

Të dy skenarët e mundshëm janë një kujtesë se vaksinat nuk janë “ilaçi i vetëm”.

Në vend të kësaj, thonë ekspertët, ndalimi i pandemisë do të marrë kohë dhe do të nevojitet respektim i vazhdueshëm i praktikave themelore të shëndetit publik si distancimi shoqëror, maskat dhe larja e duarve.