Ministri i Mbrojtjes, Prabowo Subianto, ish-gjenerali i akuzuar për shkeljen e të drejtave të njeriut, ka shpallur fitoren në zgjedhjet presidenciale të Indonezisë, ani pse nuk janë numëruar të gjitha votat.

Kandidati 72-vjeçar, të cilit SHBA-ja ia kishte ndaluar hyrjen për më shumë se 20 vjet për shkak të historisë famëkeqe, u ka thënë mijëra përkrahësve në një stadium të Xhakartës, se “fitorja është e tërë indonezianëve”.

Deri më tani nuk janë deklaruar zyrtarët e zgjedhjeve dhe dy ish-guvernatorët e provincave që kontestuan këto zgjedhje në demokracinë e tretë më të madhe të botës.

Subianto ishte gjeneral i ushtrisë gjatë periudhës brutale të diktaturës Suharto që përfundoi para 25 vjetësh. Ai ka shërbyer si komandant i forcave speciale që janë akuzuar për torturë dhe zhdukje të njerëzve. Këto akuza i ka mohuar ai.