Kina ka ekzekutuar një çift që hodhi për vdekje dy fëmijë nga dritarja e një ndërtese. Fëmijët u hodhën nga kati i 15-të, përcjell Reporteri.net, njofton BBC. 

Zhang Bo – babai i fëmijëve – dhe Ye Chengchen u shpallën fajtorë për vrasjen e vajzës dyvjeçare dhe djalit një vjeç në vitin 2020.

Zhang kishte filluar një lidhje me Ye dhe më vonë u divorcua nga gruaja e tij dhe filloi të komplotonte për të vrarë fëmijët e tij.

Çifti u ekzekutua në qytetin jugperëndimor të Chongqing të mërkurën. Nuk është e qartë se si u krye ekzekutimi, megjithëse dënimet me vdekje në Kinë kryhen kryesisht me injeksion vdekjeprurës ose një skuadër pushkatimi.

Gjykata e Lartë e Kinës i kishte quajtur motivet e çiftit “jashtëzakonisht dashakeqe”, duke theksuar “metodat e tyre mizore”.

Pasi Zhang u divorcua nga gruaja e tij në shkurt 2020, Ye i shihte dy fëmijët si “pengesë që ajo të martohej me Zhangun dhe barrë për jetën e tyre të ardhshme së bashku”.

Ye e kërcënoi në mënyrë të vazhdueshme Zhangun për të kryer vrasjet, të cilat ata komplotuan t’i organizonin si një rënie aksidentale, u tha në gjykatë. Më 2 nëntor 2020, Zhang hodhi fëmijët e tij nga dritarja e banesës nga kati i 15-të.