Qeveria Kineze ka akuzuar Shtetet e Bashkuara të Amerikes se me anë të përgjigjes së saj ndaj shpërthimit të koronavirusit, po shkakton panik dhe po përhapë frikë tek qytetarët.

Ky reagim erdhi pasi që SHBA-të kanë shpallur emergjencë shëndetësore publike dhe kanë ndaluar hyrjen në territorin amerikan të shtetasve që kanë vizituar Kinën në dy javët e fundit.

Në një konferencë për medie të hënën, zëdhënësja e Ministrisë së Jashtme Kineze, Hua Chunying, tha se veprimet e SHBA mund të krijojnë dhe përhapnin frikë në vend që të ofrojnë ndihmë.
Ajo poashtu tha se ky është vendi i parë që vendosi një ndalim udhëtimi për udhëtarët kinezë.

“Janë pikërisht vendet e zhvilluara si SHBA-të me aftësi të forta parandaluese të epidemisë që kanë marrë rolin kryesor në vendosjen e kufizimeve të tepërta në kundërshtim me rekomandimet e OBSH”,- tha ajo, raporton Reuters.

OBSH ka paralajmëruar se mbyllja e kufijve mund të përshpejtojë përhapjen e virusit, nëse udhëtarët hyjnë ilegalisht në shtete të ndryshme.

Deri tash ka më shumë se 17,000 raste të konfirmuara të virusit në Kinë. Rreth 361 njerëz kanë vdekur vetëm në kontinentin e Azisë.
Jashtë Kinës, ka më shumë se 150 raste të konfirmuara të virusit dhe një vdekje në Filipine./Reporteri.net/