Kryeministrja e Estonisë është në listën e personave të kërkuar nga Rusia për shkak të përpjekjeve të saj që të heqë monumentet e periudhës sovjetike në shtetin e saj, përcjell gazeta online Reporteri.net.

Zyrtarët kanë deklaruar se ky vendim i Rusisë ka ngritur tensionet mes shtetit rus dhe Perëndimit në kohën e luftës në Ukrainë.

Emri i kryeministres estoneze Kaja Kallas ishte shfaqur në listën e personave të kërkuar për akuza kriminale nga ministria ruse e punëve të brendshme. Në këtë listë janë të përfshirë një numër i madh zyrtarësh nga shtetet tjera baltike.

Estonia dhe shtetet tjera anëtare të NATO-s, Letonia dhe Lituania kanë hequr monumentet të cilat janë cilësuar si trashëgimi e padëshiruar e pushtimit sovjetik të këtyre shteteve.

Që kur ka nisur pushtimi rus i Ukrainës para dy vjetësh, numër i madh i monumenteve të ushtarëve të Ushtrisë së Kuqe, janë hequr në Poloni dhe në Republikën Çeke.

Moska ka kundërshtuar heqjen e këtyre monumenteve.