Një tjetër sulm i tmerrshëm në një spital në Sudan ka lënë të vrarë më shumë se 40 persona, shumë prej të cilëve fëmijë dhe mjekë, sipas asaj që bën të ditur kreu i Organizatës Botërore të Shëndetësisë (OBSH).

Sulmi ndodhi në një spital në qytetin Al Mujlad në rajonin e Kordofanit Perëndimor, një zonë afër vijës së frontit ndërmjet forcave të armatosura sudaneze dhe grupit paraushtarak Forcat e Mbështetjes së Shpejtë (RSF), të cilat ndodhen në luftë që nga prilli i vitit 2023.

“Jam thellësisht i tronditur nga sulmi i tmerrshëm ndaj spitalit në Al Mujlad, Sudan,” shkroi drejtori i OBSH-së, Tedros Adhanom Ghebreyesus, në rrjetin X (ish-Twitter).

“Sipas informacioneve të marra, më shumë se 40 persona u vranë, përfshirë fëmijë dhe punonjës shëndetësorë dhe shumë të tjerë u plagosën. Spitali është tani jashtë funksionit.”

Forcat e Mbështetjes së Shpejtë (RSF) fajësojnë kundërshtarët e tyre, ushtrinë sudaneze, për sulmin ndaj spitalit, ashtu si edhe dy grupe të shquara të shoqërisë civile, por vetë ushtria ende nuk ka komentuar mbi akuzën.

Që nga fillimi i luftës civile në Sudan në prill të vitit 2023, shkalla e vuajtjeve është aq e gjerë sa OKB-ja e ka etiketuar atë si krizën më të keqe humanitare në botë.

Përveç akuzave për gjenocid në Darfur, vrasjes së mijëra civilëve në të gjithë vendin, plus zhvendosjes së miliona të tjerëve, të dyja palët në këtë konflikt janë akuzuar për kryerjen e krimeve të luftës ndaj objekteve dhe stafit mjekësor.

Spitali Al-Mujlad, në qytetin e Muglad, ishte “i vetmi institucion shëndetësor funksional në zonë”, sipas Rrjetit të Mjekëve të Sudanit.

Nga më shumë se 40 personat e vrarë, gjashtë prej tyre ishin fëmijë dhe pesë ishin punonjës shëndetësorë, tha të dielën zyra e OBSH-së në Sudan . Dhjetëra persona të tjerë u plagosën gjithashtu, shtoi ajo.

Çështja kryesore është se spitali drejtonte një njësi dialize dhe përqendrohej në kujdesin e civilëve në vend të ushtarëve, sipas grupit të Avokatëve të Emergjencave , i cili dokumenton abuzimet si nga RSF-ja ashtu edhe nga ushtria.

Si Rrjeti i Mjekëve të Sudanit ashtu edhe grupi i Avokatëve të Emergjencave thonë se Forcat e Armatosura Sudaneze (SAF) janë fajtore për sulmin e së shtunës.

Por trupi i mjekëve thotë se arsyeja e sulmit ishte se ushtria po përpiqej të vriste luftëtarët e RSF-së “të stacionuar brenda” Spitalit al-Mujlad. RSF-ja nuk ka komentuar mbi këtë pretendim, ashtu si edhe ushtria.