Xhamia e Madhe e Mekës është shkretuar në natën e parë të faljes për muajin e shenjtë të Ramazanit.

Ndërtesa ikonë e besimit islam me histori 1,400-vjeçare qëndron e mbyllur për besimtarët dhe publikun prej masave të karantinës që autoritetet e Arabisë Saudite aplikojnë kundër koronavirusit.

Faljet brenda xhamisë lejohen vetëm për klerikët dhe personelin dytësor.

Edhe në xhaminë e Al-Aksës, në Jerusalem, një imam e thirri faljen e namazit të parë të Ramazanit të premten pa prezencën tradicionale të fetarëve.

Një numër i vogël personash, kryesisht hoxhallarë me maska mbrojtëse, ranë në gjunjë duke mbajtur të paktën dy metra distancë fizike prej njëri-tjetrit.

Sipas një besimtari mysliman, nga të paktët që është lejuar të lutet në ambientet e jashtme, është vullnet i Zotit që falja ka vlerë qoftë brenda apo jashtë xhamisë së Al-Aksës, e cila për myslimanët konsiderohet nga vendet më të shenjta.

Përpos Lindjes së Mesme, të gjitha shtetet me shumicë myslimane i kanë mbyllur institucionet e besimit.

Në këtë muaj Ramazani, iftaret dhe namazet dikur publike tani organizohen brenda vatrave familjare.

Për shumë prej tyre në Gjermani apo Britaninë e Madhe, deri më 22 maj, organet zyrtare myslimane thonë se mesazhi në këtë kohë pandemie është i qartë, Perëndia duhet nderuar por duke qëndruar në shtëpi për të shpëtuar jetën e të tjerëve.