Një tërmet i fuqishëm goditi të martën një rajon qendror të Filipineve.

Instituti i Vullkanologjisë dhe Sizmologjisë tha se tërmeti ishte i madhësisë 6.6 dhe ndodhi rreth pesë kilometra nga Cataingan, në një thellësi prej rreth 21 kilometrash.

Rrugët dhe urat janë goditur në Cataingan, qyteti bregdetar më i afërti me epiqendrën, sipas Rino Revalo, një administrator krahinor Masbate dhe imazhet fillestare të pasojave të tërmetit, raporton ABC News.

Revalo tha për rrjetin ABS-CBN se një shtëpi trekatëshe u shemb në Cataingan ndërsa toka ka pësuar plasaritje dhe bllokoi në shtëpi një policë të pensionuar së bashku me familjen.

“Njerëzit duhet të shmangin kthimin menjëherë në strukturat e dëmtuara,” tha ai, transmeton Telegrafi.

Renato Solidum, i cili drejton institutin qeveritar, tha se nuk kishte asnjë kërcënim për tsunami nga tërmeti, i cili u ndje edhe në disa provinca në të gjithë rajonin qendror të Visayas.

Filipinet shtrihen në “Unazën e Zjarrit” të Paqësorit, një hark i shkarjeve përreth Oqeanit Paqësor, ku ndodhin shumica e tërmeteve të botës.

Ndryshe, një tërmet me madhësi prej 7.7 vrau gati dy mijë njerëz në veri të shtetit në vitin 1990.