Samiti i BE-së i cili ishte planifikuar për t’u zhvilluar në datat 25-26 Mars në Bruksel do të mbahet nëpërmjet video-konferencave për shkak të valës së tretë të pandemisë së coronavirusit dhe shtimit të rasteve të infektimeve me mutacionet e reja.

Vendimi është komunikuar nga Zëdhënësi i Shtypit të BE, i cili ka lajmëruar se kreu i Këshillit Europian Charles Michel duke parë situatën e krizës sanitare nuk mund të rrezikonte zhvillimin e samitit në prezencë të turmave të mëdha.

Sipas axhendës zyrtare të takimeve 27 liderët e BE-së do të diskutonin nga afër planet për vaksinimin e popullsisë europiane dhe lëshimin e certifikatave të vaksinës për të lejuar rikthimin e lirë të qarkullimit ndërkombëtar brenda kontinentit europian, por gjithashtu do të debatoheshin dhe çështjet e “nxehta” diplomatike si marrëdhëniet e bllokut me Turqinë dhe me Rusinë.