Aeroplani që transportonte një paciente dhe nënën e saj u rrëzua të premten në mbrëmje në verilindje të Filadelfias, duke shkaktuar një shpërthim të madh.

Në aeroplan ndodheshin gjashtë persona, përfshirë pacienten dhe nënën e saj, të cilat po ktheheshin në Meksikë pas trajtimit mjekësor, deklaroi Shai Gold, zëdhënësi i operatorit ajror Jet Rescue Air Ambulance.

Në bord ishin gjithashtu katër anëtarë të ekuipazhit: piloti, bashkëpiloti, një infermier dhe një mjek, shkruan nypost.

Të gjashtë personat në bord ishin shtetas meksikanë, sipas Ministrisë së Jashtme të Meksikës.

“Në këtë moment nuk mund të konfirmojmë nëse ka të mbijetuar”, tha kompania e shërbimit emergjent. Për shkak të shpërthimit të madh, disa persona në afërsi gjithashtu u plagosën.

“Në këtë fazë, emrat nuk do të publikohen derisa familjarët të jenë njoftuar”, thuhet në deklaratën e Jet Rescue.

Ndryshe, ditë më parë u rrëzua një aeroplan me rreth 70 persona në bord në Washington D.C.