Vladimir Putin ka uruar Donald Trumpin për fitoren në zgjedhjet amerikane dhe ka shprehur admirim për mënyrën se si Trump reagoi ndaj një atentati gjatë fushatës. Ai tha gjithashtu se ishte gati për dialog me Trump, një perspektivë që do të shkaktojë shqetësim në Kiev dhe shumë kryeqytete të tjera evropiane, raporton The Guardian.

Putin dha komentet e tij të para publike mbi fitoren e Trump të enjten në mbrëmje gjatë një forumi diskutimi në Soçi, transmeton gazeta online Reporteri.net.

“Ai doli të ishte një person i guximshëm,” tha Putin, duke iu referuar sjelljes së Trump pasi një person i armatosur qëlloi ndaj tij gjatë një mitingu të fushatës në Butler, Pensilvani më 14 korrik. “Njerëzit tregojnë se kush janë në rrethana të jashtëzakonshme. Këtu një person zbulon veten. Dhe ai u tregua, për mendimin tim, në një mënyrë shumë korrekte, me guxim. Si një burrë.”

Putin gjithashtu pretendoi se Trump ishte “përndjekur nga të gjitha anët” gjatë fushatës. Ai nënvizoi vërejtjet e Trump për Ukrainën dhe Rusinë. “Ajo që u tha për dëshirën për të rivendosur marrëdhëniet me Rusinë, për të sjellë fundin e krizës ukrainase, sipas mendimit tim, meriton të paktën vëmendje”, tha Putin.

Putin tha se ishte “gati” për dialog me Trump, duke kritikuar liderët e tjerë botërorë që “dikur e telefononin atë çdo javë”, por tani e kanë ndaluar së bëri këtë. Trump, nga ana e tij, tha në një intervistë me NBC të enjten se Putin nuk ishte në mesin e dhjetëra liderëve botërorë me të cilët ai kishte folur tashmë, por se ai priste një telefonatë së shpejti. “Unë mendoj se ne do të flasim,” tha Trump./Reporteri.net/