Ministrat e jashtëm të BE-së kanë rritur presionin mbi Turqinë duke imponuar disa sanksione, pasi kjo e fundit po bënte kërkime për gaz në ujërat që i përkasin zonës ekskluzive ekonomike të Qipros, anëtar i BE-së, shkruan Reuters, transmeton Reporteri.net.

Ministrat evropianë përmes një deklarate njoftuan se në dritën e “aktiviteteve ilegale të shpimit” do të pezullojnë bisedimet me Turqinë në lidhje me Marrëveshjen e avio-komunikacionit  dhe do të kërkojnë nga Banka Evropiane e Investimeve të “rishqyrtojë” huatë për Ankaranë.

Ministri i Jashtëm turk Mevlut Çavusoglu paralajmëroi javën e shkuar se Turqia do të intensifikojë shpimet pranë Qipros nëse BE vendos sanksione. Dy anije turke të shoqëruara nga anijet luftarake po kërkojnë gaz në të dy anët e Qipros së ndarë etnikisht.

Ministrat evropianë përsëritën se veprimet e paligjshme të Turqisë kanë një “ndikim serioz negativ” mbi marrëdhëniet e Turqisë dhe BE-se dhe i bënë thirrje Ankarasë të respektojë të drejtat sovrane të Qipros në përputhje me të drejtën ndërkombëtare./Reporteri.net