Presidenti i SHBA-së, Donald Trump, njoftoi në rrjetin e tij social Truth qëllimin e tij për të pranuar një avion Boeing 747-8, me vlerë 400 milionë dollarë, si dhuratë nga familja mbretërore e Katarit. Avioni do të shërbente si aeroplani presidencial, Air Force One.

“Boeing 747 do t’i jepet Forcave Ajrore/Departamentit të Mbrojtjes të Shteteve të Bashkuara, JO MUA! Është një dhuratë nga një vend – Katari – që e kemi mbrojtur me sukses për shumë vite. Qeveria jonë do ta përdorë atë si një Air Force One të përkohshëm, derisa të mbërrijnë Boeing-ët tanë të rinj, të cilët janë vonuar shumë. Pse duhet që ushtria jonë, dhe për këtë arsye taksapaguesit tanë, të paguajnë qindra miliona dollarë kur mund ta marrin FALAS nga një vend që dëshiron të na shpërblejë për një punë të bërë mirë? Kursimet e mëdha do të përdoren për ta BËRË AMERIKËN PËRSËRI TË MADHE! Vetëm një BUDALLA nuk do ta pranonte këtë dhuratë në emër të vendit tonë. Faleminderit për konsideratën tuaj!” shkroi Trump.

Disa anëtarë të Partisë Demokratike e quajtën veprimin e mundshëm të Trumpit “shumë të paligjshëm” – gjë që Shtëpia e Bardhë e mohon  dhe kritikat erdhën edhe nga disa mbështetës të Trumpit.

Çfarë dihet për aeroplanin?

Të dielën, media amerikane raportoi se administrata Trump po përgatitej të pranonte një avion jumbo Boeing nga familja mbretërore e Katarit – duke deklaruar se avioni do të konvertohej dhe do të përdorej përkohësisht si Air Force One, emri për avionin e përdorur nga presidenti i SHBA-së.

Në të njëjtën kohë, Trump njoftoi në rrjetin e tij social Truth Social dhe shpjegoi se ishte një transaksion “publik” dhe “transparent”.

“Pra, fakti që Departamenti i Mbrojtjes po merr një DHURATË, FALAS, të një avioni 747 për të zëvendësuar përkohësisht Air Force One 40-vjeçar, përmes një transaksioni shumë publik dhe transparent, i shqetëson aq shumë Demokratët e Kalbur saqë këmbëngulin që ne të paguajmë, MË SHTRENJTË, për atë avion. Kushdo mund ta bëjë këtë! Demokratët janë humbës të klasit botëror!!!”, shkroi Trump. /Reporteri.net/