Turqia ka zbuluar një rezervë të re prej 75 miliardë metrash kub (bcm) gaz natyror gjatë punimeve të shpimit në Detin e Zi, tha të shtunën Presidenti Tayyip Erdogan.

“Me këtë zbulim, ne do të përmbushim nevojat e shtëpive në Turqi për gaz natyror për 3.5 vjet,” tha Erdogan gjatë një eventi në Stamboll, raporton Reuters.

Zbulimi, me një vlerë ekonomike prej rreth 30 miliardë dollarësh, u gjet në pusin Goktepe-3 në një thellësi prej 3,500 metrash, tha Erdogan.

Prodhimi ditor i gazit natyror në Turqi në fushën kryesore të saj, Sakarya, në Detin e Zi ka arritur në rreth 9.5 milionë metra kub, ndërsa vendi rrit ambiciet e tij energjetike si brenda ashtu edhe jashtë vendit.

Turqia, e cila importon mbi 90% të nevojave të saj për energji, po përpiqet të ulë faturën e importit dhe të rrisë sigurinë e furnizimit duke zhvilluar burime vendase dhe duke zgjeruar partneritetet ndërkombëtare në eksplorimin e naftës dhe gazit.