Të hënën anije kërkimore turke u kthyen në port nga ujërat e kontestuara pranë Qipros, sipas një faqeje interneti që merret me lëvizjet e anijeve në det.

Flota detare turke kishte thënë muajin e kaluar se anija Yavuz do të qëndronte në ujërat mesdhetare lindore në jugperëndim të Qipros deri më 12 tetor.

Por, faqja e internetit Vessel Finder tha që anija filloi të tërhiqej nga rajoni i diskutueshëm të dielën, dhe hyri në një port turk të hënën.

Turqia nuk ka bërë asnjë koment zyrtar.

Greqia dhe Turqia kanë pasur tradicionalisht marrëdhënie të tendosura dhe kanë qenë në mosmarrëveshje për dekada të tëra për një sërë çështjesh.

Dërgimi i anijes turke në Mesdhe për të kërkuar gaz natyror përshkallëzoi raportet mes tyre. Anëtarët e NATO-s, Greqia dhe Turqia, kanë tronditur aleancën ushtarake duke organizuar ushtrime ushtarake rivale në muajin gusht për të mbështetur pretendimet e tyre territoriale dhe energjetike.

Konflikti filloi të lehtësohej kur këto vende ranë dakord muajin e kaluar për të rifilluar negociatat e drejtpërdrejta në Stamboll, për herë të parë që nga viti 2016.

Mirëpo ende asnjë datë për bisedimet nuk është njoftuar. \ REL